Ziyafət Əsgərov dövlət başçısının qayğısına qalıb

 Prezidentin şərəf və ləyaqətinin qorunması üçün ayrıca qanunun qəbulu vacibdir. Bunu Milli Məclisin birinci vitse-spikeri Ziyafət Əsgərov parlamentin payız sessiyasının ilk plenar iclasında bildirib. O, öz bəyanatını onunla əsaslandırıb ki, prezident seçkiləri ərəfəsində müxalifət ölkə prezidentini təhqir edir.

“Hər kəs dövlət başçısını təhqir etməyə can atır. Bunun qarşısını almaq üçün Konstitusiyanın 106-cı maddəsinə dəyişiklik etmək, ya da yeni qanun qəbul etmək lazımdır”, -  o bildirib.

O xatırladıb ki, Milli Məclisin yaz sessiyasında şərəf və ləyaqətin təhqir olunmasına görə cəza sərtləşdirilib. 

“Bu adamlar seçkilərə 1992-ci ilin psixologiyası ilə gedirlər, onlar İsgəndər Həmidovun məntiqi ilə hərəkət edirlər. Vəziyyət o həddə çatıb ki, onlar prezidenti təhqir edirlər. Prezident dövlət başçısıdır, ali baş komandandır. Biz prezidenti bundan qorumalıyıq”, - Z.Əsgərov vurğulayıb. O, sessiya zamanı prezidentin şərəf və ləyaqətinin qorunması haqda qanunun qəbul olunmasını təklif edib.

Qeyd edək ki, CM-in 323-cü maddəsi prezidentin şərəf və ləyaqətinin təhqir olunmasına görə 2 ildən 5 ilədək azadlıqdan məhrumetmə cəzasını nəzərdə tutur.

Azərbaycan Konstitusiyasının 106-cı maddəsində isə göstərilib ki, ölkə prezidenti toxunulmazlıq hüququna malikdir. Beləliklə, ölkə prezidentinin şərəf və ləyaqəti qanunla qorunur. -16D-