Kiyev və Moskva danışıqlara hazırlaşır

Bakı/26.02.22/Turan: Fevralın 25-dən 26-na keçən gecə Ukraynanın müxtəlif regionlarında mövqe döyüşləri gedib. 

Rusiya komandanlığı desant çıxarma və hərbi hissələrə hücum taktikasından istifadə edib. Hər iki tərəfin məlumatlarına görə, ukraynalılar təcavüzkarın şəhərləri işğal etmək planlarını pozmağa müvəffəq olur. Döyüşlər əsasən şəhərlərin yaxınlığında gedir və Rusiya qoşunları küçə döyüşlərinə qarışmaqdan çəkinirlər. Kiyev, Mariupol, Sumı, Xarkov, Nikolayev və digər şəhərlərdə vəziyyət belədir.

Hər iki tərəfdən canlı qüvvə və texnika itkiləri var.

Prezident Zelenski ABŞ-ın Kiyevdən təxliyə olunmaq təkliflərini rədd edib.

Prezidentin mətbuat katibi Sergey Nikiforov bildirib ki, Ukrayna rəhbərliyi Rusiya prezidenti Vladimir Putinin danışıqlar aparmaq təklifi ilə razılaşıb.

Putin Kiyevə Ukraynanın bloklardan kənar olacağı ("bitərəfliyi") barədə zəmanətlə bağlı danışıqlar təklif edib. Zelenski özü Moskvanın təklifini şərh edərkən dövlətə təhlükəsizlik zəmanətləri verə biləcək danışıqlara hazır olduğunu bildirib.

"Ukrayna atəşkəs və sülh haqqında danışmağa hazır idi və indi də hazırdır. Bu, bizim dəyişməz mövqeyimizdir. Biz Rusiya Federasiyası prezidentinin təklifinə razılıq verdik. Bu saatlarda tərəflər danışıqlar prosesinin yeri və zamanı haqqında məsləhətləşmələr aparır. Danışıqlar nə qədər tez başlasa, normal həyatı bərpa etmək şansı o qədər çox olacaq".

Zelenski İsrailin baş naziri Naftali Bennetdən Qüdsdə Ukrayna və Rusiya arasında danışıqlarda vasitəçilik etməyi xahiş edib.

Bu gün və ya sabah atəşkəs elan ediləcəyini və hərbi mərhələnin danışıqlar mərhələsinə keçəcəyini gözləmək olar. -0-