Kiyevdə Azərbaycan-Ukrayna münasibətləri müzakirə olunub

Dekabrın 13-də Kiyevdə Ukrayna Ali Radasının sədr müavini Olena Kondratiuk Azərbaycanın bu ölkədəki səfiri Seymur Mərdəliyevlə dövlətlərarası əlaqələrin vəziyyəti və Ali Rada ilə Milli Məclisin yeni seçilmiş deputatları arasında sıx əməkdaşlığın təşviqini müzakirə edib.

Bu barədə Olena Kondratiuk X Platformasında məlumat yayıb.

"Ukrayna və Azərbaycanın beynəlxalq səviyyədə tanınmış sərhədləri daxilində ərazi bütövlüyü və suverenliyinin dəstəklənməsi ilə bağlı hər iki ölkənin dəyişməz mövqeyi vurğulandı", deyə Kondratiuk qeyd edib.

O, Azərbaycanın "müharibədən zərər çəkmiş ukraynalı uşaqların reabilitasiyası üzrə səylərini" yüksək qiymətləndirib. "Bu il Azərbaycan Əmək və Əhalinin Sosial Müdafiəsi Nazirliyinin yardımı ilə üç qrup ukraynalı uşaq məzuniyyətdə qonaqpərvərliklə qarşılanıb. Ümid edirik ki, 2025-ci ildə Azərbaycanda müharibənin ukraynalı uşaqları üçün istirahət və reabilitasiya proqramını davam etdirəcəyik", deyə Ukrayna parlamentinin vitse-spikeri qeyd edib.

Azərbaycan Rusiya-Ukrayna müharibəsinin ilk günlərindən başlayaraq Ukraynaya humanitar yardımlarını davam etdirir.

Azərbaycan Ukraynanın suverenliyi və ərazi bütövlüyünə dəstəyini dəfələrlə bəyan edib.

Ukraynaya göstərilən humanitar, o cümlədən bərpa və yenidənqurma işlərinə dəstək xarakterli yardımların ümumi məbləği 33 milyon ABŞ dollarından çoxdur.

Müharibədən zərər çəkmiş, ailə üzvlərini itirmiş ümumilikdə 214 ukraynalı uşaq Azərbaycanda tibbi və sosial-psixoloji reabilitasiya keçib.

Ukraynanın İrpin şəhərində Zərifə Əliyeva adına “Linqvist” humanitar liseyi tam bərpa edilib və bu şəhərdə infrastrukturun bərpası üzrə 4 layihə həyata keçirilir.

Ötən ilin yayında Azərbaycan prezidentinin sərəncamı ilə Ukraynaya humanitar yardım kimi elektrik avadanlıqları alınması üçün 7,6 milyon ABŞ dolları ayırılıb.

Bundan əlavə, SOCAR-ın Ukraynadakı törəmə şirkəti YDM-lərində təcili yardım maşınlarına pulsuz yanacaq doldurulması barədə göstəriş verib.