Konqresmen Den Berton Bakıda İran ətrafında vəziyyəti müzakirə edib

ABŞ Konqresinin üzvü Den Berton çərşənbə axşamı Bakıda keçirdiyi danışıqları məhsuldar adlandırıb.

Danışıqların yekunlarına dair mətbuat konfransında o bildirib ki, Azərbaycan prezidenti, parlamentin spikeri və XİN-də keçirdiyi görüşlərdə ikitərəfli münasibətlər, İran ətrafında vəziyyət, regional məsələlər, Ramil Səfərovun əfvi müzakirə olunub.

R.Səfərov ətrafında vəziyyətin şərhi barədə jurnalistlərin xahişinə cavab olaraq konqresmen bildirib ki, onun fikri Vaşinqtonun mövqeyindən fərqlənmir. “Hesab edirəm ki, Ermənistanla Azərbaycan arasında mübahisəli ərazilər ətrafında danışıqlar davam etdirilməlidir”, - konqresmen vurğulayıb.

“Berton Cənubi Azərbaycanın Azərbaycan Respublikası ilə birləşdirilməsi ilə bağlı həmkarlarından birinin çağırışını dəstəkləyirmi?” sualının cavabında konqresmen deyib ki, bu fikri bölüşmür.

İranın nüvə proqramına toxunan Berton deyib ki, “bu, təkcə Azərbaycan üçün yox, bütün region üçün təhlükədir və bu, Azərbaycan hökumətini çox narahat edir”.

O, İran nüvə proqramını davam etdirdiyi halda İsrailin və ABŞ-ın mümkün hərəkətlərini şərh etməyib, lakin qeyd  edib ki, İran öz nüvə proqramına son qoymalıdır. “İsrail öz əhalisinin təhlükəsizliyini təmin etmək üçün hər şey edəcək”, - o bildirib.

Amerika-Azərbaycan münasibətlərinə toxunan Berton deyib ki, ABŞ Azərbaycanı mühüm müttəfiqi və dostu hesab edir.

“Konqresmen Bakıda insan hüquqları məsələsini müzakirə edibmi?” sualının cavabında Berton deyib ki, bu mövzuda çox danışmayıblar, çünki Azərbaycan hakimiyyəti həmin məsələlərin ABŞ üçün əhəmiyyətini yaxşı başa düşür.

İndiana ştatından olan respublikaçı Berton Nümayəndələr Palatasının Avropa və Avrasiya üzrə alt komitəsinin sədridir.—03C06-