Konqresmen X.İsmayılovanı azad etməyə və «Azadlıq radiosu»nun bürosunu bərpa etməyə çağırıb

ABŞ Konqresinin Nümayəndələr Palatasının Xarici Əlaqələr Komitəsinin sədri Edvard Roys (Edward R.Royce) Azərbaycan prezidenti İlham Əliyevə məktub göndərib.

Məktubda “Azadlıq Radiosu”nun Bakı bürosunun bağlanmasından və jurnalist Xədicə İsmayılovanın cinayət təqibindən danışılır.

“Bir ildən artıqdır Azad Avropa/AzadlıqRadiosunun Bakı bürosu zorən bağlanıb, aparıcı jurnalisti Xədicə İsmayılova isə həbsdə yatır. Bu kədərli ildönümündə sizə yazaraq, Xədicə İsmayılova və digər jurnalistlərin həbsdə saxlanması, Bakı bürosunun isə bağlı qalmasının iki ölkənin münasibətlərinə ziyan vuracağından narahatlığımızı ifadə etmək istəyirik”, deyə 28 yanvar tarixli məktubda bildirilir.

Roys İsmayılovanın həbsini “Azərbaycanda insan haqlarının getdikcə daha artıq məhdudlaşdırılmasına bir nümunə” adlandırır. Buraya mətbuat azadlığının məhdudlaşdırılması da daxildir.

Azərbaycanda hökuməti tənqid edən jurnalistlərə qarşı repressiyalar davam edir. Bu yaxınlarda jurnalist Rauf Mirqədirovun casusluq ittihamı ilə həbsi də buna dəlalət edir.

“Sizi İsmayılovanı və digər şübhəli ittihamlarla saxlanılanları buraxmağa, AzadlıqRadiosunun Bakı bürosunun işini bərpa etməsinə icazə verməyə çağırıram”, deyə konqresmen yazır.

Xədicə İsmayılova 2014-cü il dekabrın 5-də həbs edilib. 2015-ci ilin sentyabrında o, bir sıra iqtisadi cinayətlərin törədilməsində təqsirli bilinib və 7,5 il müddətinə azadlıqdan məhrum edilib.

“Azadlıq radiosu” rəhbərliyi hesab edir ki, jurnalist hakim elitanın biznesini araşdırdığına görə cəzalandırılır. -06D-