Konvoy əməkdaşları Ülvi Həsənliyə fiziki təzyiq göstərib

Abzas Media  onlayn nəşrin direktoru Ülvi Həsənli iyunun 6-da  məhkəmədən İstintaq Təcridxanasına qaytarılarkən zorakılığa məruz qalıb, bu barədə Turan-a onun yaxınları bildiriblər.

Onların sözlərinə görə, Həsənlinin əlləri arxadan qandallanıb. Konvoy əməkdaşları onun qollarını yuxarı qaldırıb başını aşağı əyiblər. Həsənli etirazını bildirdikdə ona qarşı zorakılıq ediblər.  

Həsənlinin yaxınları bildiriblər ki, bu, artıq ikinci belə haldır. 

Penitensiar Xidmətdən şərh almaq mümkün olmayıb.

"Müdafiə Xətti" hüquq müdafiə təşkilatının direktoru Rüfət Səfərov məhbusa qarşı bu cür davranışı Azərbaycan Konstitusiyasında və Avropa İnsan Hüquqları Məhkəməsində zəmanət verilmiş hüquqların pozuntusu kimi qiymətləndirib.

O qeyd edib ki, jurnalistlərə qarşı məhkəmələr sərt "təhlükəsizlik" tədbirləri şəraitində keçirilir, onları dəstəkləməyə gələn insanlar, həmçinin həmkarlarının işlərini işıqlandıran reportyorlar məhkəmə binalarına yaxın buraxılmır.  

Hüquq müdafiəçisi bunu hakimiyyətin azad jurnalistikaya qarşı dözümsüzlüyünün göstəricisi adlandırıb.

* 20 noyabr 2023-cü il tarixində Abzas Media nəşrinin altı jurnalisti və mətbuat işçisi "valyuta qaçaqmalçılığı" ittihamı ilə həbs olunub. Onlar ittihamları qəbul etməyiblər, cinayət işini Abzas Media-da dərc olunan kkorrupsiya araşdırmaları ilə əlaqələndiriblər.

Beynəlxalq KİV-i müdafiə təşkilatları Azərbaycan hakimiyyətini saxlanılan hurnalistləri dərhal azad etməyə və KİV-ə qarşı təzyiqə son qoymağa çağırıb.