KXCP Oqtay Gülalıyevin oğluna xəsarət yetirənlərin cəzalandırılmasını tələb edir

Klassik Xalq Cəbhəsi Partiyası (KXCP) Əli Gülalıyevə qarşı baş verən cinayətin qanunauyğun şəkildə araşdırılmasını və bu cinayətdə iştirakı olanların vaxtında tapılıb cəzalandırılmasını tələb edir. Bu barədə KXCP-nin bəyanatında deyilir.  

KXCP hakimiyyəti seçki proseslərində qanunun aliliyini qorumağa, vətəndaşlara sayğı ilə yanaşmağa, siyasi dustaqları azad etməyə, iqtidarda olduğu son 20 ildə heç olmasa bir dəfə də olsa demokratik seçkilər keçirməyə çağırır.

Bir neçə gün əvvəl naməlum adamlar tərəfindən KXCP sədrinin müavini, Mlli Şuranın vahid namizədi Cəmil Həsənlinin mətbuat xidmətinin rəhbəri Oqtay Gülaliyevin məktəbli oğlu Əli Gülalıyev döyülüb və bıçaqlanaraq ciddi xəsarət alıb. 

Partiya bildirir ki, hadisədən bir neçə gün keçməsinə baxmayaraq, hüquq-mühafizə orqanları tərəfindən cinayəti törədənlər tapılmayıb,  əksinə cinayətin ört-basdır edilməsinə cəhdlər edilir.

Sentyabrın 26-da polis əməkdaşları adından bir qrup şəxs xəstə Əli Gülalıyevdən başqa mənzildə heç kəsin olmamasından istifadə etməklə zorla mənzilə soxularaq, ondan izahat almağa cəhd ediblər. 

Sənəddə deyilir ki, polislər yaralı məktəbliyə fiziki təzyiq göstərərək ondan baş verən cinayət işini bu işə aidiyyatı olmayan günahsız adamlar tərəfindən edilməsi ilə bağlı yazılı izahat almaq istəyiblər. Əlaqədar təşkilatlara edilən telefon zəngləri və qonşuların müdaxiləsindən sonra polisləri evdən çıxartmaq mümkün olub.-03D-