Lyubov Kazarnovskaya arzuolunmaz şəxslər siyahısına daxil ediləcək

“Rusiyanın opera müğənnisi Lyubov Kazarnovskaya “Azərbaycanın dövlət sərhədi haqqında” qanunu pozaraq Azərbaycanın Ermənistan tərəfindən işğal olunmuş ərazilərinə səfər edib. Müvafiq prosedur qaydalarına uyğun olaraq aparılan araşdırma nəticəsində bu şəxsin adı arzuolunmaz şəxslər siyahısına daxil ediləcək”, - Azərbaycan Xarici İşlər Nazirliyinin  mətbuat xidmətinin rəhbəri Hikmət Hacıyev jurnalistlərə bildirib.

İncəsənət xadimləri sülhə və barışığa xidmət etməli olduqları halda L.Kazarnovskayanın Azərbaycanın işğal olunmuş ərazilərində etdiyi açıqlamaları Ermənistanın Azərbaycana qarşı təcavüz və işğalını və işğal olunmuş ərazilərdə, hətta Ermənistan ərazisində Azərbaycan xalqına qarşı törədilmiş qanlı etnik təmizləməni təşviq edir.

H.Hacıyev qeyd edib ki, Azərbaycanın işğal olunmuş ərazilərində musiqi mərkəzinin yaradılmasından bəhs edən L.Kazarnovskaya bilməlidir ki, Ermənistanın Azərbaycana qarşı təcavüzü və işğal olunmuş ərazilərdə törətdiyi vəhşiliklər nəticəsində Azərbaycan xalqının maddi-mədəni irsi, o cümlədən dahi sənətkarlar yetişdirən Qarabağ musiqi məktəbi talan, dağıntı və virana məruz qoyulub.

2015-ci il iyunun 12-nə olan məlumata görə, Azərbaycan XİN-in arzuolunmaz şəxslər siyahısında 470 nəfər var.

Bu siyahıya Azərbaycan hakimiyyətinin razılığı  olmadan ölkənin işğal edilmiş ərazilərinə səfər edən şəxslər daxil edilir. Bundan sonra onların Azərbaycana səfərinə qadağa qoyulur. Eyni zamanda Azərbaycan XİN-ə müraciətlə üzrxahlıq edən və Azərbaycanın ərazi bütövlüyünə hörmətlə yanaşdığını bildirən şəxslər sıyahıdan çıxarılır.–06D--