Macarıstan xarici işlər və ticarət naziri Bakıdadır

Bakıda səfərdə olan Macarıstan xarici işlər və ticarət naziri Piter Siyarto Azərbaycan XİN-də olub.

Azərbaycanlı həmkarı Elmar Məmmədyarov ilə görüş zamanı ikitərəfli siyasi dialoqun yüksək səviyyədə inkişafı qeyd olunub. Bu barədə XİN mətbuat xidməti məlumat verib.

P.Siyarto qeyd edib ki, Bakıda keçirilən iqtisadi əməkdaşlıq üzrə Azərbaycan-Macarıstan hökumətlərarası komissiyanın 6-cı iclası iqtisadiyyatın müxtəlif sahələrində nəqliyyat, energetika, əczaçılıq, informasiya və kommunikasiya texnologiyaları, kənd təsərrüfatı və s. sahələrdə əməkdaşlığın inkişafı üçün əlverişli  şərait yaradıb və birgə layihələrin həyata keçirilməsi məsələlərinin müzakirəsi üçün meydança rolunu oynayıb.

O, Macarıstan şirkətlərinin azərbaycanlı tərəfdaşlar ilə əməkdaşlığa olan marağını qeyd edib.

Görüş zamanı beynəlxalq təşkilatlar çərçivəsində Azərbaycan və Macarıstan arasında uğurlu əməkdaşlığın və qarşılıqlı dəstəyin önəmi qeyd olunub.

Həmin gün Siyarto baş nazir Artur Rasizadə ilə görüşüb, iki ölkə arasında iqtisadi əməkdaşlığın genişləndirilməsi məsələsini müzakirə edib.-02D-