Makron Əliyevi 5 gün gecikmə ilə təbrik edib

Bakı/03.06.21/Turan: İyunun 2-də Fransa prezidenti Emmanuel Makron İlham Əliyevə 28 May Respublika Günü münasibətilə təbrik göndərib. Təbrik mətnində ikitərəfli münasibətlərin möhkəmlənməsindən və iki ölkə lideri arasında yanvarın 14-də baş tutmuş telefon danışığının böyük əhəmiyyətindən bəhs edilir.

“Dağlıq Qarabağda ölümcül döyüşlərə son qoyan 2020-ci il 9 noyabr tarixli üçtərəfli Bəyanatdan altı ay sonra yerlərdə davamlı sülhə şərait yaratmaq üçün dərin işləri davam etdirmək lazımdır. Bu, xüsusilə Ermənistan və Azərbaycan arasındakı sərhədin sülh yolu ilə delimitasiyasını və hərbi əsirlərin öz yaxınlarına qovuşa bilmələrini nəzərdə tutur. Bölgənin bütün irsinin müxtəlifliyi ilə qorunması da vacibdir. Bu baxımdan, UNESCO-nun təklif etdiyi missiyanın təşkilini asanlaşdırmağınızı tövsiyə edirəm”, deyə məktubda qeyd edilir.

Daha sonra Makron iqtisadiyyat və mədəniyyət sahəsində əlaqələrin möhkəmlənməsi arzusunu dilə gətirir və Fransanın yüksək səviyyəli dialoq qurmaq üçün Minsk Qrupunun həmsədri kimi bütün öhdəliklərini yerinə yetirməkdə davam edəcəyinə inandırır, Azərbaycan və Ermənistan arasında ədalətli və davamlı sülh əldə edilə biləcəyini qeyd edir. -02D-