Məhkəmə Hafiz Babalını ev dustaqlığına keçirməkdən imtina edib

Bu gün Bakının Xətai Rayon Məhkəməsi müdafiə tərəfin araşdırmaçı jurnalist Hafiz Babalının ev dustaqlığına keçirilməsi haqqında vəsatətini təmin etməyib.

Jurnalistin vəkili Rəşad Əliyevin Turan-a verdiyi məlumata görə, müdafiə tərəfi vəsatəti ibtidai istintaqın başa çatmaq üzrə olması və jurnalisti  həbsdə saxlamağın mənasız olması ilə əsaslandırıb.

Digər tərəfdən, Babalının səhhətində ciddi problemlər var, o, gözdən əlildir. Bundan başqa, həbsdən sonra Babalının ayaqlarında venaların varikoz genişlənməsi xəstəliyi kəskinləşib.

Babalı əvvəlki qaçaqmalçılıq ittihamları kimi, yeni ittihamları da təkzib edir və həbsini peşəkar jurnalist fəaliyyəti və korrupsiya faktlarını araşdırması ilə əlaqələndirir.

Babalı bildirib ki, onun Abzas Media ilə əlaqəsi müstəsna olaraq öz araşdırmalarının dərc edilməsi ilə bağlı olub.

Məhkəmənin qərarından apellyasiya şikayəti veriləcək.

Babalı 2023-cü ilin dekabr - 2024-cü ilin yanvar aylarında "Abzas Media-nın işi" üzrə həbs edilən altı jurnalist və mətbuat işçisindən biridir.

Əvvəlcə onların hamısına qarşı CM-in 206.3.2-ci maddəsi ilə (qaçaqmalçılıq, əvvəlcədən əlbir olan bir qrup şəxs tərəfindən törədildikdə) ittiham irəli sürülüb.

16-19 avqust tarixlərində jurnalistlərə qarşı CM-in 192.3.2 (qanunsuz sahibkarlıq,  xüsusilə külli miqdarda gəlir əldə etməklə törədildikdə), 193-1.3.1 və 193.1.3.2 (cinayət yolu ilə əldə edilmiş əmlakı leqallaşdırma), 206.4 (qaçaqmalçılıq, mütəşəkkil dəstə tərəfindən törədildikdə), 320.1 və 320.2 (sənədləri saxtalaşdırma və saxta sənədlərdən istifadə etmə), həmçinin 213.2.1-ci (vergilərdən yayınma, mütəşəkkil dəstə tərəfindən törədildikdə) maddələri ilə yeni ittihamlar irəli sürülüb.

Bu ittihamlarla 7 ildən 12 ilədək azadlıqdan məhrumetmə cəzası nəzərdə tutulur.

Jurnalistlər bütün ittihamları təkzib ediblər, hakimiyyətin yüksək eşelonlarında korrupsiya faktlarını araşdırdıqlarına görə təqibə məruz qaldıqlarını bildiriblər.

Beynəlxalq KİV-i müdafiə təşkilatları Azərbaycan hakimiyyətini saxlanılan jurnalistləri dərhal azad etməyə və müstəqil KİV-ə qarşı təzyiqə son qoymağa çağırıb.

Hüquq müdafiəçiləri "Abzas Media-nın işi" üzrə həbs edilənləri siyasi məhbus kimi tanıyır.