Məhkəmə ictimai fəal Rail Abbasovun işilə bağlı vəkilin vəsatətini təmin etməyib

Oktyabrın 10-da Bakı Ağır Cinayətlər Məhkəməsində ictimai fəal, "dələduzluq"da ittiham olunan Rail Abbasovun işi üzrə proses davam edib.

Fəalın vəkili Elçin Sadıqov Abbasovun mobil telefonunun araşdırılması və nəticələrin məhkəməyə təqdim olunması barədə vəsatət qaldırıb. Müdafiə tərəfi hesab edir ki, bu, Abbasova "zərərçəkmiş" tərəfindən zənglərin olmadığını aşkar edəcək, baxmayaraq ki, ittiham tərəfi bunun əksini iddia edir.

Məhkəmə maddi sübutların araşdırılması mərhələsinə qədər vəsatətə baxılmasını təxirə salıb.

Belə olduğu halda, vəkil məzmunu öyrənmək üçün telefonun müdafiə tərəfinə təqdim edilməsi barədə vəsatət qaldırıb. Lakin məhkəmə bu vəsatətin araşdırılmasını da maddi sübutların araşdırılması mərhələsinə qədər təxirə salıb.

Bununla əlaqədar vəkil Sadıqov etiraz edərək bildirib ki, müdafiəçinin maddi sübutlarla tanış olmasına qadağa qoyula bilməz. Hakim bunun qadağan olmadığını, sadəcə, məsələnin təxirə salındığını bildirib.

İş üzrə növbəti məhkəmə iclası oktyabrın 31-nə təyin edilib.

*20 sentyabr 2023-cü ildə Bakının Nəsimi Rayon Məhkəməsi Abbasovu Cinayət Məcəlləsinin 178.3.2-ci maddəsilə (külli miqdarda dələduzluq)  4 ay həbs edib. İş Əsgər Həziyevin şikayətinə əsaslanıb. Guya Abbasov ona 200 min manat "atıb". Rail Abbasov ittihamı rədd edir və təqibin əsl səbəbini 2022-ci ilin dekabrında həbs edilmiş fəal Bəxtiyar Hacıyevin hüquqlarının müdafiəsində fəal iştirakı ilə əlaqələndirir.

Hüquq müdafiəçiləri onların hər ikisini məhbus kimi tanıyıblar.