Məhkəmə ilahiyyatçı T.Bağırzadəni 2 il həbs cəzasına məhkum etdi

Sabunçu rayon məhkəməsi bu gün ilahiyyatçı Taleh Bağırzadəni 234.1-ci (qanunsuz narkotik əldə etmə və saxlama) maddə ilə təqsirli bilərək, cəzasını ciddi rejimli cəzaçəkmə müəssisəsində çəkməklə 2 il müddətinə azadlıqdan məhrum edib.

Məhkəmə tələsik keçirilib: bir gün ərzində hakim şahid ifadələrini dinləyib, prokurora söz verib – o, Bağırzadənin 3 il azadlıqdan məhrum edilməsini istəyib (bu maddə üzrə maksimum cəza), bir saat sonra isə hökmü elan edib.

Proses davam edərkən vəkil Anar Qasımov öz facebook səhifəsində yazıb: “Şahid polislər istintaq materialları ilə üst-üstə düşməyən ifadələr veriblər. Belə ki, ittiham aktına və protokollara əsasən, narkotik maddə Bağırzadənin şalvarının cibində tapılıb, lakin məhkəmədə polislər bildiriblər ki, narkotik pencəyin cibində aşkar edilib.

Bundan sonra dövlət ittihamçısına söz verilib. Daha sonra fasilə elan edilib.

Vəkil prokurorun çıxışından sonra etiraz əlaməti olaraq məhkəmə binasını tərk edib. Turan-ın müxbiri ilə söhbətində o bildirib ki, bu “tragikomediyanı və ədalətli mühakimənin ələ salınmasını” müşahidə etmək istəmir.

Bağırzadənin prokurorun çıxışını necə qarşılaması haqqında suala cavabda Qasımov deyib ki, o, təmkinli olub və hansı hökmün çıxarılacağının onun üçün fərqi olmadığını deyib.

Hökm elan edildikdən sonra bir dindar hakimə tüpürüb, o isə nəzarətçilərə dindarı saxlamağı əmr edib.

Qeyd edək ki, məhkəmənin belə tələsik yekunlaşması hakimiyyətin dindarların etirazlarının artmasından narahatlığı ilə bağlıdır. Belə ki, Bağırzadənin işi üzrə hər bir iclas çox sayda dindarların gəlməsi ilə əlaqədar polis üçün baş ağrısına çevrilirdi.

Oktyabrın 28-də polis böyük bir qrupu amansızca dağıdaraq, 40-a yaxın insanı saxlayıb, onlardan 4-ü barəsində isə cinayət işi açılıb.

Şübhəsiz iddia etmək olar ki, Bağırzadə yerli və beynəlxalq hüquq müdafiəçiləri tərəfindən siyasi məhbus kimi tanınacaq.

* Bağırzadə martın 31-də sürücüsü Anar Məlikovla birlikdə qanunsuz narkotik saxlamaq ittihamı ilə həbs edilib. Sürücü sonradan qanunsuz silah saxlamaq ittihamı ilə 1 il 7 ay azadlıqdan məhrum edilib. Lakin həbsin əsl səbəbi Bağırzadənin hakimiyyəti və İlham Əliyevin özünü kəskin şəkildə tənqid etməsidir. -16D-