Məhkəmə jurnalist Aytac Tapdığı ev dustaqlığına köçürməkdən imtina edib

Yanvarın 23-də Bakının Xətai Rayon Məhkəməsi Meydan TV-nin jurnalisti Aytac Tapdığın ev dustaqlığına köçürülməsi haqqında vəsatəti təmin etməyib. Bu barədə Turan-a vəkil Cavad Cavadov bildirib.

Müdafiə tərəfi hesab edir ki, jurnalistin həbsdə saxlanması üçün əsas yoxdur, çünki ona qarşı irəli sürülmüş qaçaqmalçılıq ittihamları uydurmadır. 

Tapdıq özü jurnalist fəaliyyətinə görə təqib edildiyini bildiirb. Müdafiə tərəfi jurnalisti ev dustaqlığına və ya girov müqabilində azadlığa buraxmağı xahiş edib. Lakin məhkəmə Tapdığı həbsdə saxlayıb.

Məhkəmənin qərarından apellyasiya şikayəti veriləcək, deyə vəkil qeyd edib.

* Dekabrın 6-da Meydan TV-nin əməkdaşları Aynur Elgünəş, Aytac Tapdıq, Xəyalə Ağayeva, Aysel Ümidova, Natiq Cavadlı və sərbəst jurnalist Ramin Deko (Cəbrayılzadə) valyuta qaçaqmalçılığında şübhəli bilinərək saxlanılıblar. Dekabrın 8-də məhkəmə onların hamısını həbs edib.

Jurnalistlər cinayət işini peşə fəaliyyətləri ilə əlaqələndiriblər. Hüquq müdafiəçiləri onları siyasi məhbus kimi tanıyıblar.