Məhkəmə məmuru Bəxtiyar Hacıyevə qarşı şikayətdən imtina edib

Mayın 17-də ictimai fəal və hüquq müdafiəçisi Bəxtiyar Hacıyevin işi üzrə məhkəmə prosesində zərərçəkən məhkəmə məmuru Orxan Abdullayevin ifadələri dinlənilib.

İstintaq materiallarına əsasən, Yasamal Rayon Məhkəməsində Hacıyev və Ülviyyə Muradova (Alovlu) arasında baş verən insident zamanı fəal guya Abdullayevi itələyib.

Lakin Hacıyev bildirib ki, həmin vaxt Abdullayev, ümumiyyətlə, məhkəmə zalında olmayıb. Bu gün Bakı Ağır Cinayətlər Məhkəməsində iclas zamanı Abdullayev hakimin, Hacıyevin, müdafiə və ittiham tərəflərinin suallarını cavablandırıb.

Abdullayevin məhkəməyə verdiyi ifadələrlə Hacıyev və Alovlu arasında baş verən insidentdən sonra ilkin istintaqda verdiyi ifadələr arasında uyğunsuzluq müəyyən edilib. Hakim Abdullayevdən soruşub ki, Hacıyevdən şikayətçidir, ya yox. O, mənfi cavab verib. Abdullayev Hacıyevə qarşı iddialarından imtina etdiyini yazılı şəkildə bildirib.

Növbəti məhkəmə iclası mayın 31-nə təyin edilib.

* Hacıyev 9 dekabr 2022-ci ildə jurnalist Ülviyyə Alovlunun şikayəti əsasında açılan iş üzrə saxlanılıb. Əvvəlcə Cinayət Məcəlləsinin 221-ci (xuliqanlıq) və 289-cu (məhkəməyə hörmətsizlik) maddələrilə ittiham olunub.

2023-cü ilin iyulunda Cinayət Məcəlləsinin 192-ci (qanunsuz sahibkarlıq), 193-1-ci (cinayət yoluyla əldə edilmiş gəlirlərin leqallaşdırılması) və 206-cı (qaçaqmalçılıq) maddələrilə ittihamlar irəli sürülüb.

7 noyabr 2023-cü ildə Cinayət Məcəlləsinin 213.1-ci (vergidən, işsizlik, icbari tibbi və sosial sığorta üzrə ödənişlərdən yayınma) maddəsilə ittiham irəli sürülüb.

Bəxtiyar Hacıyev bütün ittihamları rədd edir, hakimiyyəti tənqid etdiyinə görə təqib olunduğunu bildirir və repressiyalarda əli olan azərbaycanlı məmurlara və güclərə beynəlxalq sanksiyalar tətbiq etməyə çağırır. Hüquq müdafiəçiləri onu siyasi məhbus kimi tanıyıblar.