Məhkəmə Meydan TV-nin jurnalistlərini 4 ay müddətinə həbs edib (yenilənib)

Məhkəmə Meydan TV-nin jurnalistləri Aynur Elgünəş, Aytac Tapdıq, Natiq Cavadlı, Xəyalə Agayeva və müstəqil jurnalist Ramin Dekonu 4 ay müddətinə həbs edib.

Onların hamısı qaçaqmalçılıq ittihamını rədd edib və cinayət işini peşə fəaliyyətləri ilə əlaqələndiriblər.

Bu iş üzrə Ülvi Tahirov da həbs edilib. Vəkili Bəhruz Bayramovun sözlərinə görə, Tahirovun Meydan TV ilə heç bir əlaqəsi yoxdur. “Onlar Aynur Elgünəşlə sadəcə ailəvi dost idilər. Tahirovun evinda  axtarış zamanı külli miqdarda pul götürülüb. Lakin Tairov pulun vergi ödəyicisi kimi həyat yoldaşına məxsus olduğunu bildirib. Onun xidmətlərin göstərilməsi barədə  müqavilələri var və görülmüş işlər müqabilində  əmək haqqı  alınıb. Tahirovun özü 2022-ci ildən xaricə getməyib”, – vəkil bildirib.

Həbs qərarlarından apellyasiya şikayəti veriləcək.

* * *

2024-12-08 13:33

Məhkəmə Meydan TV jurnalistlərinin həbsi ilə bağlı işlərə baxmağa başlayıb

Dekabrın 8-də Bakının Xətai Rayon Məhkəməsi Meydan TV-nin əməkdaşı Aysel Umudova barəsində 4 ay müddətinə həbs qətimkan tədbiri seçib. O, Azərbaycan Cinayət Məcəlləsinin 206.3.2-ci (qaçaqmalçılıq, bir qrup şəxs tərəfindən qabaqcadan əlbir olaraq törədildikdə) maddəsilə ittiham olunur.

Bu barədə Turan-a Umudovanın vəkili Ağıl Layıc məlumat verib.

Onun sözlərinə görə, məhkəmənin qərarı əsassız və qanunsuzdur.

O qeyd edib ki, Umudovanın özünə  və müdafiə tərəfinə  “ittihamın mahiyyətini aydın deyil”.

Vəkil qeyd edib ki, Umudovanın  bir müddət ölkədən çıxışına “stop” qoyulub və o, ümumiyyətlə, ölkəni tərk etməyib.

 Sonra təhsil almaq üçün və ya başqa şəxsi məqsədlərlə xaricə gedəndə hər dəfə hava limanında gömrük bəyannamələrini təqdim edib. Halbuki buna ehtiyac olmayıb.

Jurnalist başa düşürdü ki, alternativ mediada fəaliyyətini nəzərə alaraq nə vaxtsa belə bir ittihamla üzləşə bilər ona görə bəyannamələr təqdim edirdi.

Vəkil Umudovanın səhhətinin yaxşı olmadığını bildirib.

Son iki gündə ona iki dəfə təcili yardım çağırılıb. “Və bu gün özünü yaxşı hiss edmirdi” deyən vəkil həbs qərarından apellyasiya şikayəti veriləcəyini bildirib.

Meydan TV-nin saxlanılan digər jurnalistləri  də - Aynur Elgünəş, Aytac Tapdıq, Natiq Cavadlı, Xəyalə Tağıyeva və müstəqil jurnalist Ramin Deko. məhkəmə qarşısına çıxarılıb.

Jurnalistləri 5 ildən 8 ilə qədər həbs gözləyir.