Məhkəmə siyasi tədqiqatçının şikayətini təmin etməyib
Məhkəmə siyasi tədqiqatçının şikayətini təmin etməyib
Avqustun 27-də Bakı Apellyasiya Məhkəməsi hakim Ramin Qaraqurbanlının sədrliyi ilə Səbail Rayon Məhkəməsinin siyasi tədqiqatçı Bəhruz Səmədov barədə seçdiyi həbs qətimkan tədbiri qərarından verilən şikayəti təmin etməyib.
Vəkil Zibeydə Sadıqova Turan-a bildirib ki, Bəhruz Səmədov məhkəmədə iştirak edib.
"Bəhruz Səmədov məhkəmədə bildirdi ki, o tamamilə təqsirsizdir, dövlətə xəyanətdən söhbət gedə bilməz. O, ancaq sülh tərəfdarıdır, müharibələrin və insan itkilərinin əleyhinə olub. Mən isə məhkəmədən xahiş etdim ki, Səmədov istintaq getdiyi zaman azadlıqda olsun, istintaqın çağrışına cavab verməsə o zaman barəsində həbs qətimkan tədbiri seçilə bilər. Amma məhkəmə vəsatətimi təmin etmədi", deyə o qeyd edib.
Bu arada, Bəhruz Səmədovun nənəsi Zibeydə Osmanova Turan-a deyib ki, nəvəsi həbs ediləndən onunla telefon əlaqəsi saxlamayıb.
"Bəhruzun məndən, mənim isə Bəhruzdan başqa heç kimim yoxdur. Nəvəmin səsinə möhtacam, onu dinləyib bir az olsa da sakitləşmək istərdim. Evdə tək qalmışam, dörd divar arasında təklik məni çox sıxır. Cəmiyyətimiz Bəhruzu tək qoymasın", deyə o qeyd edib.
Siyasi tədqiqatçı avqustun 21-də saxlanılıb. Dövlət Təhlükəsizliyi Xidmətinin əməkdaşları onun yaşadığı evdə axtarış aparıb. Evdən onun komputerlərini, telefonlarını, sənədlərini, sertifikatlarını və kitablarını götürüblər.
Avqustun 23-də Səbail Rayon Məhkəməsi Bəhruz Səmədovun barəsində 4 aylıq həbs qətimkan tədbiri seçib.
Siyasi tədqiqatçı Cinayət Məcəlləsinin 274-cü (dövlətə xəyanət) maddəsi ilə ittiham olunur.
Səmədovun həbsi ilə bağlı Dövlət Təhlükəsizliyi Xidməti hələ məlumat yaymayıb.
Bəhruz Səmədov "OC Media" və "Bakı Araşdırmalar İnstitutu"nun təsisçisi və rəhbəridir. O, Azərbaycan hakimiyyəti ilə bağlı tənqidi yazıları və Qarabağ münaqişəsində sülhpərvər mövqeyi ilə məşhurdur.
Siyasi tədqiqatçı Mərkəzi Avropa Universitetinin beynəlxalq əlaqələr bölməsinin məzunu, Karlov Universitetinin siyasi elm bölməsinin doktorantura tələbəsidir. Səmədov poststrukturalist və psixoanalitik nəzəriyyələrə əsaslanaraq Azərbaycanda hegemoniya və siyasi diskursları araşdırır.
Siyasət
-
Azərbaycan və RF prezidentləri - İlham Əliyev və Vladimir Putin Rusiya liderinin Bakıya 18-19 avqust tarixlərində baş tutan dövlət səfərinin yekunlarından məmnun olduqlarını bildiriblər, bu barədə Kremlin mətbuat xidməti iki dövlət başçısı arasında telefon danışığının yekunlarına dair məlumatında bildirib.
-
Vəkil Cavad Cavadov Turan-a bildirib ki, avqustun 27-də Avropa Məhkəməsi Qaydalarının 39-cu maddəsinə uyğun olaraq, Azərbaycan hökumətinə Hüseyn Abdullayevin sağlamlıq vəziyyətinin stasionar müalicəyə və ya ambulator müalicəyə və ya hər hansı təcili tibbi müdaxiləyə ehtiyac olub-olmadığını müəyyən etmək üçün əlavə hərtərəfli müayinələrdən keçirmək və bununla bağlı məhkəməyə məlumat vermək göstərişi verib.
-
27 avqust 2024-cü il tarixində Ankarada Türkiyə və Azərbaycan XİN başçıları - Ceyhun Bayramov və Hakan Fidanın görüşündə iki ölkə arasında mövcud müttəfiqlik münasibətlərinin siyasi, təhlükəsizlik, müdafiə, iqtisadi-ticari, enerji, nəqliyyat-kommunikasiya, humanitar və s. aspektləri, habelə regional və beynəlxalq təhlükəsizlik məsələləri müzakirə edilib, bu barədə Azərbaycan XİN-in mətbuat xidməti məlumat yayıb.
-
Bazar ertəsi Birləşmiş Ştatlar bildirib ki, bu yaxınlarda Azərbaycanda gənc alim, jurnalist və sülh müdafiəçisi Bəhruz Səmədovun həbsini "narahatlıqla izləyir", xəbəri Turan-ın Vaşinqtondakı müxbiri verib.
Rəy yaz