Məhkəmə zalında Fazil Qasımovun vəziyyəti pisləşib

Cümə axşamı Bakı Ağır Cinayətlər Məhkəməsində iqtisadçı Fazil Qasımovun işi üzrə proses davam edib. İclasda ittiham aktı elan edilib.

Lakin prokurorun çıxışından əvvəl Qasımov etiraz edərək bildirib ki, o, günahsızdır və ona qarşı cinayət işinə xitam verilməlidir.

Bununla belə, hakim bundan əvvəl irəli sürülmüş ittihamları təsdiqləyən prokurora söz verib. Bundan sonra Qasımovun vəziyyəti kəskin pisləşib və həkim çağırıblar.

Bununla əlaqədar məhkəmə dinləmələri dekabrın 12-nə keçirilib.

* Fazil Qasımov 8 avqust 2023-cü ildə İstanbulda həbs olunaraq Azərbaycana gətirilib. O, tanınmış iqtisadçı və Azərbaycan hökumətinin tənqidçisi Qubad İbadoğlu ilə birlikdə saxta pul hazırlamaqda ittiham olunub. Lakin hazırda Fazil Qasımovun cinayət işinə İbadoğlunun cinayət işindən ayrı baxılır.

İyunda o, qanunsuz həbsinə etiraz edərək aclıq elan edib. Son vaxtlar əvvəlkitək qidadan imtina edir, yalnız bal ilə şirinləşdirilmiş su və yoqurt qəbul edir.