Məhkəmədə Xocalı soyqırımının dəhşətli təfərrüatları açıqlanıb

Keçmiş erməni yaraqlı Rəşid Beqlaryan Qarabağın Xocalı şəhərinin sakinlərinin kütləvi qətliamı ilə bağlı ermənilərin gizlətdiyi faktları açıqlayıb. 62 yaşlı Beqlaryan 2023-cü ilin avqustunda Laçın rayonu ərazisində Azərbaycan-Ermənistan sərhədini qanunsuz keçmək istəyərkən həbs edilib. İstintaqı Dövlət Təhlükəsizliyi Xidmətinin Baş İstintaq İdarəsi aparıb. Bu günlərdə Sabunçu Rayon Məhkəməsinin binasında Füzuli rayonunun hərbi hakimi Əli Süleymanovun sədrliyilə məhkəmə prosesi başlayıb. Məhkəmədə müttəhimə pulsuz vəkil və tərcüməçi verilib.

İstintaq zamanı və məhkəmədə Beqlaryan Xocalı, Ağdam, əsgəran, Kəlbəcərdə Azərbaycana qarşı döyüşlərdə şəxsən iştirak etdiyini etiraf edib. Silahlı separatçı karyerasına Qarabağ komandiri Vitali Balasanyanın sürücüsü kimi başlayan Beqlaryan silahlı separatçılar dəstəsinin komandiri vəzifəsinə yüksəlib. O etiraf edib ki, 26 fevral 1992-ci ildə onun da daxil olduğu erməni silahlı birləşməsi iki yüzə yaxın dinc azərbaycanlını xüsusi amansızlıqla qətlə yetirib.

“Hər yerdə, o cümlədən Əsgəranda erməni silahlı dəstələri yaradılmışdı", - müttəhim danışıb. – Bizim dəstəyə Vitali Balasanyan rəhbərlik edirdi. Mən sürücü kimi onun bəzi tapşırıqlarını yerinə yetirirdim. Əsgəran sakini Seqo Doluxanyanla dostluq edirdim. Seqo dedi ki, Xocalı sakinlərini əsgəran dəstəsi qarşılayacaq. Qarabağ erməniləri bilirdilər ki, dinc azərbaycanlılar məhz bu yolla hərəkət edəcəklər. Əlli-altmış silahlı adam onları gözləyirdi. Məqsəd Xocalı sakinlərinin toplaşmasını gözləmək və onları öldürmək idi. Orada 150-yə yaxın dinc sakin vardı. Seqo dedi ki, onlar Əsgəran qalasına çatanda  hamısını güllələyəcəklər. O zaman biz azərbaycanlılara nifrət edirdik, hətta əmr olmadan da onları öldürərdik. Camaat bir yerə toplaşanda biz silahları onlara yönəltdik. Onlar rəhm etməmizi istəyirdilər, biz də onlara baxıb gülürdük. Onların arasında qadınlar, qocalar və uşaqlar vardı. Sonra onları güllələməyə başladıq.

Çox qorxunc mənzərə idi. Yalnız kiçik bir qrup Ağdama qaçaraq xilas ola bildi. Qalanları öldürüldü. Cəsədlərin üstündəki qiymətli əşyaları topladıq. Bir həftə sonra Əsgəran ermənilərindən eşitdim ki, güllələnmiş azərbaycanlıların cəsədləri çürüyür və epidemiya başlaya bilər. Ona görə də biz Xocalı sakinlərinin cəsədlərini toplayıb bir yerdə dəfn etdik. Mən özüm heç kimi öldürmədim, sadəcə, iştirak etdim".

Hakimin “O, ermənilərin Xocalıda soyqırım törətdiyini etiraf edirmi” sualına Beqlaryan müsbət cavab verib.

Məhkəmədə həmçinin məlum olub ki, cinayətkarlara maddi yardım üçün Fransadan Rəşid Beqlaryanın hesabına iki milyon avroya yaxın vəsait köçürülüb.

Azərbaycan Dövlət Təhlükəsizliyi Xidmətinin məlumatına görə, Beqlaryan Xankəndi şəhərindəki 3 saylı uşaq xəstəxanasında saxlanılan azərbaycanlı əsirlərə işgəncə verməkdə şübhəli bilinərək həbs edilib. Ona qarşı Cinayət Məcəlləsinin 112-ci (beynəlxalq hüquq normalarını pozaraq azadlıqdan məhrumetmə), 113-cü (işgəncə), 115-ci (müharibə qanunları və adətlərinin pozulması), 279-cu (qanunvericilikdə nəzərdə tutulmayan silahlı birləşmələrdə iştirak) və 318-ci (Azərbaycanın dövlət sərhədini qanunsuz keçmək) maddələrilə ittiham irəli sürülüb.