Mehriban Əliyeva ermənilərlə görüşə razıdır?

Fransa-Ermənistan dostluq qrupunun sədri Filip Katsenbah erməni və azərbaycanlı deputatları Qarabağ münaqişəsinin nizamlanması məqsədilə dialoqun qurulması üçün dəvət edir.

Panarmenian saytı Nouvelle d`Armenie-ya istinadən bildirib ki, Katsenbah Ermənistan-Fransa dostluq qrupunun rəhbəri Ara Babloyan və Azərbaycan-Fransa dostluq qrupunun rəhbəri Mehriban Əliyevaya dəvət göndərib. 

Məktubda deyilir: “Noyabrın 29-da erməni deputatların Fransaya səfəri zamanı Dağlıq Qarabağda vəziyyətə dair “dəyirmi masa” təşkil etmək istəyirdim. Görüşə ATƏT-in Minsk Qrupunun keçmiş fransalı həmsədrini də dəvət etmək istərdim. Dostum Ara Babloyan Fransada Ermənistan və Azərbaycan parlamentariləri arasında görüşə maraq göstərib. Məqsəd Qarabağda davamlı sülhün əldə olunması istiqamətində fəaliyyətə başlamaqdır. Bundan əlavə, “dəyirmi masa”da iştirak etmək üçün “Fransa-Qafqaz” dostluq qrupunun prezidentini dəvət etmək niyyətindəyəm”.

O deyib ki, M.Əliyeva ötən ilin yazında öz prinsipial razılığını verib. Katsenbah ümidvar olduğunu bildirib ki, Dağlıq Qarabağda sülhə nail olmaq üçün Fransa Senatında daha bir imkan yaranacaq.

Turan-ın M.Əliyevanın rəhbərlik etdiyi Heydər Əliyev Fondundan şərh almaq cəhdləri baş tutmayıb, Milli Məclislə əlaqə yaratmaq cəhdləri də nəticə verməyib.-02D-