M.Əliyeva: Qarabağda 177 qanunsuz hüquqi şəxs aşkar edilib

Bakı/20.07.18/Turan:Azərbaycanın birinci vitse-prezidenti Mehriban Əliyeva Müstəqil Dövlətlər Birliyinin (MDB) iştirakçısı olan ölkələrin Daxili İşlər Nazirləri Şurasının Bakıda keçirilən iclasının iştirakçılarını qəbul edib.

M.Əliyeva Azərbaycanda cinayətkarlığın aşağı səviyyədə olduğunu xüsusi vurğulayıb. Şuranın fəaliyyətinin gələcəkdə belə müsbət meyllərin möhkəmlənməsinə töhfəsini verəcəyinə əminliyini bildirib.

Birinci vitse-prezident qloballaşmanın doğurduğu yeni təhdidlər və çağırışlarla səmərəli mübarizə aparmaq üçün əməkdaşlığın zəruriliyini vurğulayıb.

M.Əliyeva İnterpolun baş katibi Yurgen Ştoka bu qurumun gələcəkdə də bu regionda təhlükəsizliyin təmin olunmasını dəstəkləyəcəyinə ümidvar olduğunu bildirib.

M.Əliyeva İnterpol rəhbərinin diqqətini Qarabağdakı bəzi şirkətlərin qanunsuz fəaliyyətinə cəlb edib: "Hazırda Azərbaycanın işğal olunmuş ərazilərində qanunsuz iqtisadi fəaliyyət həyata keçirən 177 xarici hüquqi şəxs aşkar edilib.

Bununla yanaşı, 710 xarici vətəndaş işğal olunmuş ərazilərə gəlib. Dağlıq Qarabağ Azərbaycanın ayrılmaz hissəsidir, ölkəmizin ərazi bütövlüyünü bütün dünya tanıyıb".

Birinci vitse-prezident belə pozuntuları Azərbaycan qanunvericiliyinin kobud şəkildə pozulması kimi dəyərləndirib.

M.Əliyeva son illərdə bu ərazilərdə narkotiklər becərilməsi və trafiki üçün istifadə olunması kimi faktların mövcud olduğunu söyləyib.

Birinci vitse-prezident bu cəhətdən İnterpolun dəstəyinə çox bel bağladıqlarını söyləyib. -05D-