Mərkəzi Seçki Komissiyası parlament seçkilərinin yekunlarına dair protokolu təsdiqləyib

Sentyabrın 16-da Azərbaycan Mərkəzi Seçki Komissiyası VII çağırış Milli Məclisə seçkilərin ümumi nəticələri və məsələnin Konstitusiya Məhkəməsinin təsdiqinə verilməsi haqqında protokolu təsdiqləyib. Mərkəzi Seçki Komissiyasının rəhbəri Məzahir Pənahov bildirib ki, Mərkəzi Seçki Komissiyası 46 seçki məntəqəsində nəticələri etibarsız sayıb. Eyni zamanda, 17 dairədə 35 məntəqə seçki komissiyası buraxılıb.

46 məntəqədə seçkilərin nəticələrinin ləğvi sentyabrın 2-nə keçən gecə elan edilmiş nəticələrə təsir göstərməyib. Yəni, bu saxtalaşdırma və pozuntuların qeydə alındığı məntəqələdə bütün deputatlar tanınıb.

Beləliklə, 125 deputatdan 81-i 11 siyasi partiyanın üzvüdür.

Qanunvericiliyə əsasən, Konstitusiya Məhkəməsi 10 gün ərzində seçkilərin nəticələrini yoxlamalı və təsdiqləməlidir.

Xatırladaq ki, prezident İlham Əliyevin rəhbəri olduğu Yeni Azərbaycan Partiyası Milli Məclisdə mütləq çoxluğunu yeniləyir və  68 yer alıb.

Daha 44  yerə hökumətyönlü mövqeyi ilə tanınan  “müstəqillər” yiyələnəcəklər.

Vətəndaş Həmrəyliyi Partiyası üç (Fəzail İbrahimli, Rafael Hüseynov və Tənzilə Rüstəmxanlı), Ədalət, Hüquq və Demokratiya Partiyası iki (Qüdrət Həsənquliyev və Elçin Mirzəbəyli)  deputatla təmsil olunacaqlar.

Daha 8 partiya - Respublikaçı Alternativ Partiyası (Erkin Qədirli), Milli İstiqlal Partiyası (Arzuxan Əlizadə), Demokratik İslahatlar Partiyası (Asim Mollazadə), Ana  Vətən Partiyası (Günay Ağamalı), Böyük Quruluş Partiyası (Fazil Mustafa), Böyük Azərbaycan Partiyası (Elşad Musayev), Milli Cəbhə Partiyası (Razi Nurullayev)  Azərbaycan Demokratik Maarifçilik Partiyası ( Elşən Musayev) hərəyə bir deputat mandatına malik olacaq.

Seçkilərdə seçici fəallığı 37,27% olub.