Məşhur "nasist ovçusu" Rusiyanın Ukraynadakı hərbi cinayətlərinin araşdırılmasına rəhbərlik edəcək

Vaşinqton/22.06.22/Turan: ABŞ-ın baş prokuroru Merrik Qarland və Qlobal cinayət mühakiməsi üzrə səfir Bet Van Şaak çərşənbə axşamı Ukraynanın baş prokuroru İrina Venediktova ilə görüşmək üçün Ukrayna-Polşa sərhədində olub. Onlar Rusiyanın təcavüzü dövründə törədilmiş hərbi cinayətlərin məhkəmə təhqiqatını müzakirə ediblər.

Görüşdən sonra Qarland hərbi cinayət törədənlərin məsuliyyətə cəlb edilməsi məqsədilə işin mərkəzləşdirilməsi üçün "Hərbi cinayətlər siyahısı" hazırlanacağını bildirib.

ABŞ-ın Ədliyyə Departamentinin məlumatında deyilir ki, araşdırmalar üzrə ekspertlər komandasına ən məşhur "nasist cinayətləri ovçusu" Eli Rozenbaum rəhbərlik edəcək.

Rozenbaum əvvəllər Ədliyyə Departameninin İnsan Hüquqlarının Müdafiəsi Strategiyası şöbəsinin direktoru vəzifəsində işləyib və təqsirləndirilən nasistlərin vətəndaşlıqdan məhrum edilməsi və deportasiyası üzrə 100-dən çox işə baxıb.

"Hərbi cinayətkarlar heç yerdə gizlənə bilməz. ABŞ-ın Ədliyyə Nazirliyi Ukraynada müharibə aparan və vəhşiliklər törədənlərin məsuliyyətə cəlb edilməsi üçün bütün imkanlardan istifadə edəcək", deyə Qarland qeyd edib.

Öz növbəsində, Dövlət Departamentinin mətbuat katibi Ned Prays jurnalistlərə bildirib ki, Qarland və Şaak Ukraynadan Parisə yola düşəcəklər, burada ABŞ və Aİ-nin ədliyyə və daxili işlər nazirlərinin eyni mövzuya həsr olunmuş görüşü keçiriləcək. 25B