MeydanTV jurnalistlərinin mənzillərində axtarışlar (YENİLƏNİB)

Dekabrın 6-da axşam saatlarında MeydanTV-nin saxlanılan əməkdaşı Natiq Cavadlının Sumqayıtda yaşadığı mənzildə axtarış aparılıb.

Bu barədə jurnalistin ailəsindən Turana  bildiriblər.

“Natiq özü axtarışda iştirak edirdi. Polislər öncə Natiqin şkafını axtardılar. Şkafdakı bütün kitabları tökdülər. Kitabların arasını axtardılar. Sonra yataq otağında axtarış apardılar. Natqin komputerini və bir-iki köhnədən qalan fləşkartları götürdülər. Evimizdə cəmi 90 manat pulumuz var idi. Pulu götrmədilər. Axtarış iki saat davam etdi. Hətta uşaqlarımızın komputerlərinin yaddaşını da yoxladılar”, jurnalistin ailəsindən Turana bildiriblər.

Dekabrın 6-da axşam saatlarında MeydanTV-nin saxlanılan digər  əməkdaşı Aynur Elgünəşin yaşadığı evdə  də axtarış aparılıb.

Bu barədə jurnalistin qohumları bildirib.

“Evin açarları Aynurda idi. Biz evə daxil olanda orada hər şeyi dağıdılmış vəziyyətdə gördük. Çox yəqin ki, axtarışda Aynurun özü iştirak edib. Çünki evin qapısı sındırılmayıb. Amma mənzilin  daxilində hər şey dağınıq vəziyyətdədir. Nə götürdükləri barədə bir söz dedyə bilmərik”, jurnalıstin qohumlarından biri Turana deyib.

MeydanTV-nin redaksiyasından  saxlanılan digər jurnalistlərin də mənzillərində axtarış aparıldığını bildiriblər.

* * *

2024-12-06 23:22

Meydan TV jurnalisti gecə saatlarında təcili yardım çağrılıb

Bakı şəhər Baş Polis İdarəsinə saxlanılan Meydan TV-nin əməkdaşı Aynur Elgünəşə gecə saatlarında təcili yardım çağrılıb.

* * *

2024-12-06 22:26

Vəkillərə Meydan Tv-nin jurnalistləri ilə görüşə icazə verilmir

 Vəkil Nazim Musayevə Meydan Tv-nin jurnalisti Xəyali Ağayevanın müdafiəsinə buraxılmayıb. 

Vəkilin jurnalistlərə verdiyi məlumata görə, özünü müstəntiq Nahid Abbaslı kimi təqdim edən kapitan rütbəli zabit onu jurnalistin olduğu kabinetə qədər müşayiət edib.

Bundan əvvəl o, vəkilin orderinin fotosunu çəkib. Onlar kabinetə daxil olanda orderin fotosunu müstəntiq  kiməsə göndərib. Bundan sonra o, vəkilə deyib ki, onun erderində  guya “bugünkü tarix  deyil” və Musayevin Ağayevanı müdafiə etməsinə icazə verilməyib.

Musayev müstəntiqin hərəkətlərini “özbaşınalıq” kimi qiymətləndirib.

Ağayeva vəkilə  ondan izahat aldıqlarını və vəkil gələnə qədər onunla müəyyən istintaq hərəkətləri apardıqlarını bildirməyə macal tapıb.

Saxlanılan digər jurnalistlərə də vəkil buraxılmır.

* * *

2024-12-06 22:23

Meydan Tv-nin bəyanatı

Məlum olduğu kimi 6 Dekabr Cümə günü saat 13:00 radələrində Meydan TV ilə əməkdaşlıq etmiş bəzi şəxslərlə əlaqəmiz kəsilib. Axtarışlarımız nəticəsində məlum olub ki, həmin şəxslər Bakı Şəhər Baş Polis idarəsində saxlanılırlar.

Aynur Qənbərova (Elgünəş)
Aytac Əhmədova (Tapdıq)
Xəyalə Ağayeva
Natiq Cavadlı
Aysel Umudova
Ramin Cəbrayılzadə (müstəqil jurnalist)

Yuxarıda adları qeyd olunan jurnalistlərin bəzilərinin evlərində axtarış aparılıb. Onlara aid olan şəxsi avadanlıqlar və əşyalar götürülüb.

Daxili İşlər Nazirliyinin yaydığı məlumatda da qeyd edilib ki, jurnalist Ramin Cəbrayılzadə (Deko) ölkəyə qeyri-qanuni xarici valyuta gətirməsi ilə əlaqədar daxil olan məlumat əsasında polis tərəfindən saxlanılıb. Bundan əlavə bir neçə şəxs də araşdırma çərçivəsində saxlanılıb. Qeyd edək ki, Ramin Deko müstəqil jurnalist olaraq reportyor kimi fəaliyyət göstərir.

Meydan TV rəhbərliyi olaraq bildiririk ki, jurnalistlərimizin saxlanılması, dindirilməsi qeyri-qanunidir və bütün bu ittihamları rədd edirik.

Fəaliyyətə başladığımız gündən, jurnalistlərimiz həbs edilib, özləri və ailələri təqiblərə məruz qalıb, onlara müxtəlif təzyiq və təhdidlər olub. Bizimlə əməkdaşlıq edən jurnalistlərin ölkədən çıxışına qanunsuz şəkildə qadağa qoyulub.

Saytımız 2017-ci ildən etibarən ölkə sərhədləri daxilində rəsmi olaraq qadağan edilib. Kanalın sosial media hesabları dəfələrlə kiberhücuma məruz qalıb və məlumat, materiallar silinib.

Meydan TV yarandığı gündən bu yana ölkədə baş verən hadisələri, vətəndaşların problemlərini, onların şikayət və müraciətlərini düzgün şəkildə ictimailəşdirməyə çalışır.

Məqsəd də ölkədə müstəqil və alternativ media qurumu formalaşdırmaq və insanları məlumatlandırmaqdır. Yarandığımız gündən bəri bizə edilən təzyiq və ittihamlar əsassızdır və bir daha qeyd edirik ki, biz jurnalistika fəaliyyətimizə davam edəcəyik.