Milli Şura 2014-cü il üçün prioritetlərini müəyyən edib (YENİLƏNİB)

Demokratik Qüvvələrin Milli Şurası (DQMŞ) yanvarın 16-da keçirilən sessiyasında 2014-cü il üçün əsas prioritetləri təsdiqləyib.

Mühüm məsələ kimi siyasi motivlərlə həbs edilmiş şəxslərin – müxalifət partiyalarının üzvləri, gənc fəallar, jurnalistlər, dindarlar- hüquqlarını effektiv müdafiə sisteminin yaradılması və onların azadlığa buraxılmasına nail olmaq qarşıya qoyulub.

DQMŞ ölkənin sosial həyatında baş verən prosesləri izləmək və əhalini hakimiyyətin onların həyat səviyyəsinə mənfi təsir edən addımları barədə məlumatlandırmaq niyyətindədir. 

DQMŞ yerli və beynəlxalq ekspertlərin, ziyalıların iştirakı ilə avtoritarizmdən demokratiyaya keçidin yollarını müzakirə etmək üçün beynəlxalq konfrans keçirəcək.

DQMŞ həmçinin azad və ədalətli seçkilərin təminatına yönələn seçki strategiyasını hazırlamağı; seçki qanunvericiliyinin təkmilləşdirilməsinə,seçki komissiyalarının paritet əsaslarla formalaşmasına nail olmağı planlaşdırır.

DQMŞ söz, ifadə, toplaşma azadlığı da daxil olmaqla, fundamental hüquq və azadlıqların təminatı üzrə sistemli iş təşkil etmək niyyətindədir.

Sosial şəbəkələrdə vətəndaşların fəallığının artırılması üzrə addımların qəbulu, demokratik proseslərdə vətəndaş cəmiyyətinin rolunun gücləndirilməsi nəzərdə tutulur.

DQMŞ inzibati idarəçilik islahatlarının sürətləndirilməsi məqsədilə effektiv formaları müəyyən etmək niyyətindədir.

Həmçinin DQMŞ Azərbaycanın Avrointeqrasiyasına yardım göstərməyi, “Şərq tərəfdaşlığı” məqsədlərinin Azərbaycanda ardıcıl həyata keçirilməsi üzrə proqram qəbul etməyi planlaşdırır.

Korrupsiya, inhisarçılığın ifşası və qarşısının alınması üçün KİV-in, sosial şəbəkələrin imkanlarından effektiv istifadə təklif olunur.

Saxtalaşdırılmış prezident seçkiləri haqda müsbət rəy verən beynəlxalq təşkilatların və müşahidə missiyalarının üzvlərinin ifşa olunmasının davam etdirilməsi və bundan ötrü diasporun imkanlarından istifadə nəzərdə tutulur. 

DQMŞ təşkilati strukturların təkmilləşdirilməsini davam etdirmək, əhali ilə kütləvi işi, vətəndaş cəmiyyəti institutları ilə əməkdaşlığı genişləndirmək niyyətindədir.

Sessiyada Koordinasiya Şurasının tərkibi formalaşıb. 

KŞ-yə aşağıdakılar daxil olub: Cəmil Həsənli (DQMŞ-nin sədri), Rüstəm İbrahimbəyov (fəxri sədr), Əli Kərimli, Mehriban Vəzir, Mehman Əliyev, Mirmahmud Mirəlioğlu, Fuad Ağayev, Leyla Yunus, Rafiq Manaflı, Mirvari Qəhrəmanlı, Eldəniz Quliyev, İbrahim İbrahimli, Kamil Vəli Nərimanoğlu, Hacıbaba Əzimov, Nurəddin Mustafayev, Vidadi Mirkamal, Gültəkin Hacıbəyli, Rövşən Əhmədli, Namizəd Səfərov. Bir yer NİDA hərəkatına verilib.

Eldar Namazov və Sülhəddin Əkbər KŞ-ya daxil olmaqdan imtina ediblər. Onlar bunu “El” hərəkatında (partiyaya çevrilir) və Açıq Cəmiyyət Partiyasında (bu təşkilatın bazasında Azad Demokratlar Partiyası yaradılır) partiyadaxili quruculuq işləri ilə  əsaslandırıblar.—06D—

2014 Yanvar 16 (Cümə axşamı) 18:58:16

Bu gün günün ikinci yarısında Xalq Cəbhəsi Partiyasının ofisində Demokratik Qüvvələrin Milli Şurasının iclası başlayıb. İclasda “2014-cü il üçün Milli Şuranın Fəaliyyət İstiqamətləri” adlı sənəd müzakirə olunur.

Sənəddə müzakirələrin fəallaşdırılması, ölkənin sosial-iqtisadi problemlərinin həlli üzrə təkliflər hazırlanması, seçkiqabağı strategiyanın hazırlanması, vətəndaş cəmiyyətinin əsaslarının möhkəmləndirilməsi, vətəndaşların hüquq və azadlıqlarının müdafiəsi və s. nəzərdə tutulur.

Müzakirələr zamanı Koordinasiya Şurası seçilməsi təklif edilib. Milli Şura üzvlərindən 19 namizəd irəli sürülüb.

KŞ-nin məşvərət orqanı olacağı, ümumi strategiyanın işlənib hazırlanmasını müzakirə edəcəyi və qərarların qəbulunu əlaqələndirəcəyi nəzərdə tutulur.

KŞ yaradılması ideyasını EL hərəkatının sədri Eldar Namazov təklif etmişdi.

Saat 19-da KŞ tərkibi ilə bağlı müzakirələr davam edirdi. -02В-