Milli Şura Gürcüstan hakimiyyətindən Fərman Ceyranlını azad etməyi tələb edib

Bakı/10.12.18/Turan: Azərbaycan Demokratik Qüvvələrinin Milli Şurası (DQMŞ) bəyanat yayaraq, Gürcüstanda məşhur alim və cərrah Fərman Ceyranlının cinayət təqibini pisləyib.

O, 2017-ci il mayın 18-dən Gürcüstanda təsisçisi olduğu "Lanset" klinikasənda xəstənin qara ciyər nəqli zamanı ölümü ittihamı ilə həbsdədir. Amma DQMŞ həbsin əsl səbəbinin Azərbaycan hakimiyyətinin siyasi sifarişi olduğunu hesab edir.

"Milli Şuranın sədri professor Cəmil Həsənlinin və Koordinasiya Mərkəzinin üzvü Tofiq Yaqublunun dekabr ayının 6-da Gürcüstan Apellyasiya Məhkəməsində keçirilən prosesdə iştirakı bu əminliyi bir daha təsdiq etdi", deyə bəyanatda bildirilir.

Sənəd müəllifləri Fərman Ceyranlının həbsinin praktiki olaraq Gürcüstandan qayıdan AXCP sədr müavini Gözəl Bayramlının saxlanılması və Tbilisidə jurnalist Əfqan Muxtarlının oğurlanması ilə eyni vaxta təsadüf edib.

"Bu hadisələr, hökumətin müxalifətə qarşı böhtan və qarayaxma siyasətinin əsas təbliğat ruporlarından olan haqqin.az saytının yuxarıda adları çəkilən şəxslərin həbs edilməsi tələbilə hökumətə müraciətindən az sonrakı dövrə təsadüf edir. Həmin müraciətdə deyilirdi ki, Fərman Ceyranlı Tiflisdə siyasi mühacirlərin fəaliyyətinin koordinasiyası və müxalifətin maliyyələşdirilməsi ilə məşğuldur", deyə DQMŞ-nin bəyanatında bildirilir.

Tbilisidə məhkəmə zamanı Fərman Ceyranlı və onun vəkili çox ciddi arqumentlərlə ittihamın saxta olduğunu sübuta yetirdilər. Məhkəmə Gürcüstanın rəsmi həkim-ekspert komissiyasının həmin cərrahi əməliyyat haqqında Fərman Ceyranlının xeyrinə olan rəyini də nəzərə almayıb.

"Tbilisi Apellyasiya Məhkəməsinin prosesi dəfələrlə təxirə salması, prosesi süni şəkildə uzatması və hələ də hökm çıxarmaması, bu həbsin siyasi sifariş olduğunu göstərir", deyə bəyanatda qeyd edilir.

DQMŞ demokratiya sahəsində inqilabi dəyişikliklərə imza atmış, postsovet ölkələri arasında hüquqi dövlət standartlarına ən çox yaxınlaşmış, NATO və AB üzvlüyünün bir addımlığında olan Gürcüstanda bu cür hüquqi özbaşınalığın baş verməsinə təəsüf edir.

DQMŞ Gürcüstanın dövlət orqanlarının qeyri-legitim, korrupsiyaçı və cinayətkar Əliyevlər rejiminin öz opponentlərinə qarşı çirkin üsullarla mübarizəsində yer almasından dərin narahatlığını bildir və Fərman Ceyranlının dərhal azad edilməsini tələb edir. -06D-