Milli Şura həbsdəki gənclərə azadlıq tələb edir

Demokratik Qüvvələrin Milli Şurası (DQMŞ) “NİDA” Gənclər Hərəkatının həbsdə olan üzvlərinə əlavə ittihamlar irəli sürülməsini pisləyən bəyanat yayıb. 

Sənəddə deyilir ki, sentyabrın 12-də “Nida” Gənclər Hərəkatının 7 üzvünə (Məmməd Əzizov, Bəxtiyar Quliyev, Şahin Novruzlu, Rəşadət Axundov, Üzeyir Məmmədli, Rəşad Həsənov və Zaur Qurbanlı) və Azad Gənclik təşkilatının üzvü İlkin Rüstəmzadəyə Cinayət Məcəlləsinin 220.1 (zorakılıqların, talanların, yanğınların törədilməsi, əmlakın məhv edilməsi ilə müşayiət olunan kütləvi iğtişaşları təşkil etmə və ya belə iğtişaşlarda iştirak etmə) maddəsi ilə əlavə ittiham irəli sürülüb. 

Milli Şura gənclərin həbsinin özünü qanunsuz sayaraq, ittihamları qəti şəkildə pisləyir. Müəlliflərə görə, bu addımla iqtidar ictimai-siyasi aktivliyin artan xətt üzrə yüksəldiyi seçki ərəfəsində cəmiyyətin aktiv təbəqəsi, kütləvi aksiyaların aparıcı qüvvəsi olan gəncliyi qorxutmağa, susdrumağa səy göstərir. 

İqtidara sovet imperiyasının represiyyaları, hərbi zirehli texnikası qarşısında duruş gətirib geri çəkilməyən, sınmayan xalqını və gəncliyini belə primitiv şər-böhtanla qorxutmağın, susdurmağın mümkün olmayacağını bəyan edirlər. Avtoritar idarəetmə, qanunsuz həbslər, vətəndaşları hədə-qorxu altında saxlamaqla mövcudluğunu qorumağa çalışan Əliyevlər sülaləsinin xalqın bu idarəetmədən bezdiyinin və seçkilərdə bu iqtidara son və qəti sözünü deyəcəyinin fərqində olduğu qeyd edilir.  

Xalq arasında və dünyada dayaqlarını itirən iqtidar insanları qorxu altında saxlamağla, fəal insanları həbsə atmaqla onları uzun müddətə ictimai-siyasi proseslərdən kənarda saxlamağa çalışır. Gənclərə qarşı irəli sürülən əlavə ittihamlar bu narahatlıq və qorxunun məntiqi təzahürü adlandırılır.  

Qurum iqtidarı həbs və təzyiq kampaniyasına son qoymağa, qanunsuz həbsdə olan bütün siyasi və vicdan məhbuslarını qeyd-şərtsiz azad etməyə çağırır. -05D-