Milli Şura Rusiyanı Ukraynanı işğal cəhdində ittiham edir

Demokratik Qüvvələrin Milli Şurası (DQMŞ) Ukraynadakı hadisələrlə bağlı bəyanat yayıb.

Ukraynada keçmiş Yanukoviç hökumətinin Avrointeqrasiya proseslərinə əks mövqeyi nəticəsində baş verən kütləvi etirazlar inqilab adlandırılır. Bu etirazlar nəticəsində hakimiyyətin dəyişməsi xalqın qələbəsi kimi şərh edilir. Hazırda xalqın yeni hakimiyyət seçkisi astanasında olduğu vurğulanır.

Xalqın bu qələbəsindən sonra Rusiyanın Ukraynanın ərazi bütövlüyünə ciddi təhlükə yaratdığı nəzərə çatdırılır. “Rusdilli əhalinin hüquqlarının qorunması” adı ilə Rusiyanın Krıma ərazi iddiaları müstəqil dövlətə təcavüz sayılır.  “Ukrayna xalqının mübarizəsi haqq işidir və dünya qarşıdurmada Ukraynanın yanında olmalıdır” mövqeyini ifadə edir. Rusiyanın 2008-ci ildə Gürcüstana müdaxiləsilə indi Ukraynaya müdaxiləsi arasında paralel aparan müəlliflər sonuncunu “daha geniş miqyasda təkrar” hesab edirlər. O zaman Gürcüstanın dünya birliyindən lazımi dəstək almadığını xatırladan müəlliflər Ukraynaya münasibətdə bu səhvin təkrar olunmamasına ümid etdiklərini vurğulayırlar.

Bu fonda Rusiyanın Krıma ərazi iddiaları, əsgəri qüvvə yeritməsi, referendum təyin etməsi Krımın qanunu sahibləri olan Krım tatarlarının vətəninin qəsbi sayılır. Rus-sovet imperiyasının Krım tatarlarını zaman- zaman genosidə, deportasiyalara  məruz qoyaraq soyqırıma yol verdiyi vurğulanır. Daha sonra sənəddə Krımın ərazi olaraq Rusiya, daha sonra Ukraynanın tərkibinə verilməsi proseslərinə toxunulur. XX əsrin 50-80-ci illərində Krım tatarlarının ağır mübarizə nəticəsində tarixi vətənə dönməkləri haqda danışılır. Bəyanatda SSRİ dağılan zaman Krıma muxtariyyət statusunun verilməsi Krım tatarlarının tarixi haqqının tanınması üçün nəzərdə tutulduğu qeyd olunur. Müəlliflər Ukraynanın həm ərazi bütövlüyünün, həm də  Krım tatarlarının tarixi vətənə dönmələrinin etibarlı təminatı olaraq Ukrayna dövlətinə Krımdan deportasiya edilmiş  Krım tatarlarının varislərinə ikili vətəndaşlıq verilməsini təklif edirlər.

Son olaraq müəlliflər hesab edirlər ki, Krım ətrafında hadisələr dinc yolla nizamlanmalı, bu məsələdə beynəlxalq hüquq və Ukraynanın ərazi bütövlüyü əsas götürülməlidir.-05D-