Milli Şura Xədicə İsmayılovaya qarşı təzyiqlərin dayandırılmasını tələb edir

Milli Şura araşdırmaçı jurnalist Xədicə İsmayılovaya edilən təzyiqlərdən narahatdır.

Milli Şuranın mətbuat xidmətindən Turan-a daxil olan bəyanatında  Xədicə İsmayılovaya qarşı atılan addımları repressiv üsullarla jurnalisti susdurmaq cəhdi  kimi hesab edir.

“Biz hesab edirik ki, bunlar təkcə araşdırmaçı jurnalistə qarşı deyil, həm də bütövlükdə cəmiyyətə qarşı təhdid və qorxu yaratmaq niyyəti daşıyır. Başqa bir səbəb də odur ki, ölkədə sosial problemlər daha da kəskinləşir, intiharlar artır və vətəndaşların məmurların haqsız əməllərinə etiraz olaraq özünü yandırması halları görünməmiş hal alır. Belə bir zamanda Azərbaycan hakimiyyəti gündəmi dəyişmək üçün süni “cəsus” qalmaqalı yaradaraq ölkədəki sosial və ictimai problemlərdən diqqətləri yayındırmağa çalışır,” - bəyanatda deyilir.

Buna görə Milli Şura Azərbaycan hakimiyyətindən jurnalistə qarşı çirkin hücumları dayandırmağı tələb edir.

Milli Şura xatırladıb ki, mətbuat azadlığına hörmət etmək təkcə ictimai çağırış deyil. Bu, Azərbaycanın beynəlxalq öhdəlikləri və ölkə qanunlarının tələbidir. Bunlar təkcə siyasi məsuliyyət yaratmır, bu addımların hər bir iştirakçısı həm də cinayət məsuliyyəti daşıyır.-16D-