Minlərlə Ukraynalı uşaq Rusiya düşərgələrindədir - Yelsk laboratoriyasının hesabatı

Vaşinqton, Kolumbiya bölgəsi/15.02.23/Turan: Rusiya hökuməti minlərlə ukraynalı uşağın köçürülməsi, yenidən tərbiyə edilməsi, hərbi hazırlığı və zorla övladlıq götürülməsi üzrə sistemli tədbirlər çərçivəsində onlarla düşərgədən ibarət geniş şəbəkəni idarə edir, bu barədə Yelsk Humanitar Araşdırmalar Laboratoriyasının Münaqişələr Observatoriyasının apardığı tədqiqatda deyilir, xəbəri Turan-ın Vaşinqtondakı müxbiri verib. 

Yeni hesabat müharibə zamanı Rusiyada nəzarət altında olan 4 aydan 17 yaşa qədər 6000 ukraynalı uşaq haqqında məlumatları sənədləşdirib. Uşaqların bu düşərgəyə gətirilməsinə ötən ilin fevralından başlanıb, sonuncu köçürmələr isə ötən ay baş verib.

"Rusiya hökumətinin bütün səviyyələri cəlb edilib", deyə Yelsk Laboratoriyasından Nataniel Reymond virtual brifinq zamanı Turan-ın müxbirinə bildirib.

Rusiyaya və Rusiya tərəfindən işğal olunmuş ərazilərə zorla köçürülən uşaqların ümumi sayı yüz minlərlədir, deyə Conflict Observatory-nin əməliyyatlar üzrə direktoru Keytlin Hovart bildirib.

On bir düşərgə, Sibir və Uzaq Şərqdəki iki düşərgə də daxil olmaqla Ukrayna sərhədindən 500 mil məsafədə yerləşir. 12 düşərgə Qara Dəniz ətrafında, 7-si işğal edilmiş Krımda, 10-u Moskva, Kazan və Yekaterinburq şəhərlərinin ətrafında cəmləşib. 11 düşərgə Ukrayna sərhədindən 500 mildən çox məsafədə, o cümlədən ikisi Sibirdə və biri Uzaq Şərqdə yerləşir.

Bu müəssisələrin ən az 32-si ukraynalı uşaqların yenidən tərbiyə edilməsi üzrə sistemli işlə məşğul our. Onları Rusiyanın hazırki rəhbərlərinin dəyərləri istiqamətləndirir. Bəzilərini "yetim" elan ediblər və rus ailələrə veriblər.

Bu hərəkətlər uşağın şəxsi statusunun, o cümlədən vətəndaşlığının dəyişdirilməsini qadağan edən Cenevrə Konvensiyasının pozuntusudur və hərbi cinayət və ya insalığa qarşı cinayət ola bilər, deyə tədqiqatda bildirilir.

Hesabatda həmçinin bu proqramın həyata keçirilməsində və siyasi cəhətdən əsaslandırılmasında iştirak edən onlarla federal, regional və yerli məmurun adı çəkilir.

Turan-ın müxbirinin bu cinayətdə Putinin şəxsən təqsirli olub-olmadığı haqqında sualına cavabda Reymond belə deyib: "Vladimir Putin Rusiyanın prezidenti kimi hərbi cinayətlər haqqında beynəlxalq hüquqa uyğun olaraq onun tabeliyində olanların, Rusiya adından hərəkət edən daha aşağı səviyyəli şəxslərin hərəkətlərinə görə məsuliyyət daşıyır". 

Dövlət Departamentinin nümayəndəsi Ned Prays, öz növbəsində, brifinqdə bildirib ki, Rusiyanın ukraynalı uşaqların zorla köçürülməsi, yenidən tərbiyə edilməsi və övladlıq götürülməsi sistemi "Kremlin Ukraynanın kimliyini, tarixini və mədəniyyətini inkar etmək və boğmaq üzrə sistemli səylərinin əsas elementidir".

Turan-ın müxbirinin Dövlət Departamentinin bu proqramın həyata keçirilməsində bilavasitə iştirak etdiyi müəyyən edilən 12 şəxsə qarşı sanksiya tətbiq etməyi planlaşdırıb-planlaşdırmadığı haqqında sualına cavabda Prays deyib: "Biz həmişə Ukraynada hərbi cinayətlərə və vəhşiliklərə görə məsuliyyət daşıya biləcək şəxsləri axtarırıq".

35 səhifəlik hesabatın tam versiyasını burada oxuya bilərsiniz: https://hub.conflictobservatory.org/portal/sharing/rest/content/items/97f919ccfe524d31a241b53ca44076b8/data.  0