M.Kərimli: Jurnalist olduğumu dedikdə təhqirlə cavab verdilər

Müsavat Partiyası nümayəndə heyətinin tərkibində yanvarın 13-də Lənkərana gedərkən basqına məruz qalan partiya mətbuat xidmətinin əməkdaşı, jurnalist Mehman Kərimli olay haqqında Turan-a məlumat verib.

O qeyd edib ki, İsa Qəmbərin başçılığı ilə Lənkərana gələn maşın korteji şəhərin girəcəyi sayılan dairəyə daxil olanda qarşı tərəfdə dayanan maşından bir qadın düşərək yaxınlığa qaçıb və bundan sonra qadınlar, yaşlı və cavan kişilər, habelə uşaqlardan ibarət kütlə kortejə hücuma keçib.  

M.Kərimli baş verənləri kameraya çəkərkən bir qadın tərəfindən üzərinə yumurta atıldığını, daha sonra bir neçə gənc tərəfindən taxtalarla döyüldüyünü deyib. “Bu adamlar çəkilişin qarşısını almaq üçün zərbələri əllərimə daha çox endirdilər ki, kamera əlimdən düşsün”, - deyə M.Kərimli qeyd edib.

Sonradan iki nəfər idmançı görkəmli şəxs M.Kərimlinin qoluna girərək zorla kənara çəkiblər. M.Kərimlinin jurnalist vəsiqəsini təqdim etməsini bu adamlar söyüş və təhqirlə cavablayıblar. Onu qara “Ceep”də oturmuş şəxsin yanına gətiriblər. M.Kərimli burada 1 saata yaxın saxlandığını, gəlişlərinin səbəblərini öyrənməklə bağlı sorğu-suala məruz qaldığını deyib. Müraciət etməsinə baxmayaraq, bu şəxs özünü təqdim etməyib. “Bir azdan məlum olacaq, ya səni buraxırıq, ya da şöbəyə aparırıq”, - deyə bu şəxs jurnalistə bildirib. M.Kərimlinin kamerası əlindən alınıb. Təqribən 1 saata yaxın müddətdən sonra bu şəxslər kameranı da qaytararaq M.Kərimlini taksi ilə yola salmaq istəsələr də, jurnalist imtina edərək avtobusla Bakıya qayıdıb. -05B-