Müdafiə tərəfi Zamin Salayevin ev dustaqlığına buraxılması ilə bağlı vəsatət qaldırıb

Bakı/29.03.23/Turan: Azərbaycan Xalq Cəbhəsi Partiyasının (AXCP) fəalı Zamin Salayev azadlığa buraxılması tələbi ilə Bakı İstintaq Təcridxanasında 51 gündür aclıq aksiyası keçirir.

Bu barədə Turan-a onun oğlu Oqtay Salayev məlumat verib.

“Bu gün (martın 29-da) atam zəng etdi. Onun səhhəti  getdikcə pisləşir. O, artıq yeriməkdə çətinlik çəkir. Atamın baş ağrıları, başgicəllənmələri artıb. O, vaxtaşırı huşunu itirir. Buna baxmayaraq, ata aclığı davam etdirmək niyyətindədir”, - deyə O.Salayev bildirib.

Martın 29-da Z.Salayevin vəkili Nemət Kərimli müxalifətçinin ev dustaqlığına buraxılması ilə bağlı yenidən Qaradağ Rayon Məhkəməsinə vəsatət təqdim edib. O, ərizəni məhkəməyə şəxsən təqdim edib.

Onun sözlərinə görə, martın 13-də poçt vasitəsilə göndərilən əvvəlki müraciət ünvana çatmayıb.

Öz növbəsində, Ombudsman Aparatının mətbuat xidmətinin rəhbəri Emil Şahzadə Z.Salayevin vəziyyəti ilə bağlı Turan-ın sorğusuna cavab verərək bildirib ki: “Ombudsmanın Milli Preventiv qrupunun üzvləri tərəfindən mart ayında Zamin Salayevlə bir neçə dəfə görüşlər keçirilib və burədə müvafiq qaydada dövlət qurumlarına müraciətlər edilib”.

“Qeud etmək lazımdır ki, Zamin Salayevin saxlanılma şəraiti və səhhətinin vəziyyəti ombudsmanın diqqətindədir. Mütəmadi olaraq onun səhhəti barədə məlumatlar tələb olunur  və öyrənilir.

Bu gündə əlaqə saxlanılıb və onun təkrar hakim müayinəsindən keçirələcəyi bildirilmişdir”, - deyə Şahzadə daha sonra deyib.—06D-