Müsavat Partiyası iqtidarı qeyri-səmimilikdə ittiham edir

Müsavat Partiyası cümə günü ölkədəki siyasi məhbusların dərhal azad edilməsi, azad mətbuata basqılara son qoyulması ilə bağlı bəyanat yayıb.

Müəlliflər dövlət başçısı İlham Əliyevin Azərbaycan Xalq Cümhuriyyətinin banisi Məhəmməd Əmin Rəsulzadənin 130 illik yubileyilə bağlı imzaladığı fərmanın, jurnalistlərlə görüşün mətbuatda rejimin islahatlara getməsi, dialoq yönündə addımı kimi dəyərləndirilməsinə etiraz edirlər. Müəlliflər siyasi məhbuslar, sifarişli məhkəmələr qaldıqca, söz, media azadlığına təzyiqlər davam etdikcə ölkədə heç nəyin dəyişməyəcini nəzərə çatdırırlar.     

Adı çəkilən fərman və görüşün ən yaxın günlərin gerçəyi olduğu deyilir, bunun üstündən bir neçə gün keçməmiş “Azadlıq” qəzetinə KİV-lərə Dəstək Fondunun yardımının dayandırılmasına toxunaraq? iqtidarın münasibətdə səmimi olmadığı vurğulanır. Müəlliflər bu addımı “Azadlıq” qəzetinin tam sıradan çıxarılması üçün iqtidarın qanunsuz və zorakı üsullardan istifadəsi kimi dəyərləndirirlər. Daha sonra müəlliflər diqqəti bütün ölkəni bürüyən siyasi məhkəmə proseslərinə cəlb edirlər. 

Müəlliflər Müsavat Partiyası funksionerlərinin, gənclər qurumları üzvlərinin əsassız olaraq mühakimə olunduqlarını qeyd edirlər. İqtidarın siyasi həbsləri nəinki saxlamadığını, əksinə, müsavatçıları, cəbhəçiləri, gəncləri şərləyərək həbsə almaqda davam etdiyini vurğulayırlar.   

Belə həbsləri müəlliflər avrointeqrasiya və demokratik proseslərə zidd, avtoritarizmin güclənməsi kimi qiymətləndirirlər. Belə həbslərin rejim sahiblərinə heç bir uğur gətirməyəcəyini bəyan edən müəlliflər iqtidara avtoritar idarəçilikdən əl çəkməyi, bütün siyasi məhbusları azad etməyi, azad mətbuata basqıları dayandırmağı tələb edirlər. 

Son olaraq, müəlliflər ölkə və beynəlxalq ictimaiyyətə bu istiqamətdə prinsipial mövqe bildirmək çağırışı ilə müraciət edirlər. -05D-