Müsavat Partiyası iqtidarı qeyri-səmimilikdə ittiham edir

Müsavat Partiyasının Divanı bazar ertəsi növbəti toplantısını keçirib.

Partiyanın ADR-in qurucusu Məhəmməd Əmin Rəsulzadınin 130 illik yubileyilə bağlı Novxanıda keçirdiyi tədbir xüsusi qeyd olunub. Bu ilki “M.Rəsulzadə ili” çərçivəsində görüləcək tədbirlər barədə danışılıb.  

Rəsmi Bakının M.Rəsulzadənin yubileyilə bağlı sərəncam verməsinə baxmayaraq, icraya soyuq yanaşması iqtdarın qeyri-səmimiliyi kimi şərh edilib. Partiyanın M.Rəsulzadə ilə bağlı tədbir keçirilməsi üçün yer istəməsinə şəhərin mərkəzində yox, kənarda yer verilməsi, Zaqatala və Gəncədə bu münasibətlə mitinq keçirilməsinin qarşısının alınması həmin qeyri-səmimiliyin göstəricisi kimi dəyərləndirilib. 

Divanda son zamanlar Ermənistan-Azərbaycan təmas xəttində baş verən hadisələr də müzakirə olunub. Atəşkəsin  pozulması ilə ordudakı tələfat və dinc əhalinin təhlükəsizliyi baxımından narahatlıq yarandığı ifadə edilib. Hakimiyyətə Qarabağ problemi ətrafında imitasiya siyasətinə son qoyaraq problemin həlli yönündə real addımlar atmasının vacibliyi xatırladılıb. Beynəlxalq aləmdən işğalçı ilə işğala məruz qalan tərəflərə bərabər yanaşma siyasətinə son qoyması, problemin həllinə obyektiv yanaşması tələb olunub. 

Partiya Divanı iqtidarın müxalifətə repressiv siyasətinin təzahürü olan məhkəmə prosesləri, siyasi funksionerlərə, gənclərə, inanclılara qarşı haqsızlıq və özbaşınalığı bir daha pisləyib. 

Divan, Avropa Məhkəməsinin qərarı olmasına baxmayaraq, keçmiş səhiyyə naziri Əli İnsanovun hələ də həbsdə saxlanmasını, ona təzyiqlərin artmasını, yaxınları ilə ünsiyyətdən məhrum olunmasını yolverilməz sayaraq, Avropa Məhkəməsinin qərarlarına əməl olunmasını tələb edib. -05D-