Müsavat Partiyası rəsmi Bakını Ukraynanı dəstəkləməyə çağırıb

Müsavat Partiyası Divanının növbəti toplantısı keçirilib. Bu xəbər Turan-a partiyadan verilib.

Toplantı iştirakçıları 2013-cü ilin yanvarında İsmayıllı rayonunda baş verən hadisələrlə bağlı məhkəmə prosesində ittiham edilənlərin yüksək cəza almalarını hökmün siyasi sifarişlə verilməsi kimi dəyərləndiriblər.

Eyni zamanda Lənkəran Rayon Məhkəməsinin qərarı ilə həbsə alınan Yadigar Sadıqlı  məhkəmənin çıxardığı qərara öz qeydlərini yazıb, amma bu qeydlər nəzərə alınmayıb. Şirvan Apellyasiya Məhkəməsi Lənkəran məhkəməsinin bu qeydlərə mövqeyini bildirməsi barədə qərar çıxarsa da Lənkəran məhkəməsi bunu etmir. Divan Lənkəran məhkəməsinin bu addımını Y.Sadıqlıya qarşı qanunsuzluqların davam etməsi adlandırıb.

Toplantıda habelə “Qanun” nəşriyyatına qarşı təzyiqlər də tənqid edilib, belə qanunsuz halların aradan qaldırılması zərurətu vurğulanıb.

Divan Azərbaycan hökumətinin fəaliyyətilə bağlı parlamentə təqdim etdiyi hesabatı “real durumdan çox uzaq” adlandırıb.

Krımda baş verən hadisələrə münasibətini ifadə edən Divan rəsmi Kremlin himayəsilə keçirilən referendumun hüquqi qüvvəsi olmadığını və nəticələri tanımadığını bəyan edir. Eyni zamanda rəsmi Bakıdan Azərbaycannı strateji müttəfiqi və GUAM üzvü olan Ukraynanın ərazi bütövlüyünün dəıstəklənməsi yönündə ardıcıl və prinsipial mövqe sərgiləməsini tələb edir.-05D-