Müsavat Partiyası təqiblərə məruz qaldığını bildirir

Müsavat Partiyası ölkədə bahalaşmaya etiraz aksiyaları fonunda partiya fəallarının hakimiyyət tərfindən təqiblərinə etiraz bəyanatı yayıb.

“Yaranan iqtisadi böhranın aradan qaldırılması üçün heç bir əməli tədbir görməyən hakimiyyətin əməlllərinə xalqın etirazı spontan şəkildə artmaqdadır”, deyə sənəddə bu etirazlara münasibət ifadə edilir. Belə etirazların Ucar, Lənkəran, Siyəzən, Ağcabədi, Ağsu və s. rayonlarında olduğu vurğulanır.  Müsavat Partiyası bu aksiyalarda irəli sürülən tələblərin haqlı oduğunu bəyan edir.

Aksiyalarda  iştirak edənlərin evlərində vəhşicəsinə döyülərək polis bölmələrinə aparılması, müxtəlif müddətə həbs cəzaları verilməsi, bəziləri haqda cinayət işi qaldırılması etirazların mahiyyətinin dəyişdirilməsi və əhalidə xof yaratmaq cəhdi sayılır. 

Müsavat Partiyası başqanı Arif Hacılının Baş Mütəşəkkil Cinayətkarlığa Qarşı Mübarizə İdarəsinə çağırılaraq xəbərdarlıq edilməsi, partiyanın Lənkəran və Siyəzən rayon təşkilatları rəhbərlərinin həbsi faktları hakimiyyətin təzyiqi hesab edilir.

Partiyanın bəzi rayon qurumlarının rəhbərliyinə daxil olan şəxslərin hüquq-mühafizə orqanlarına çağırılaraq, xəbərdarlıq edilməsi halları qeydə alınır. Hüquq-mühafizə orqanları partiyanı xalqı etirazlara çağıran vərəqlər yaymaqda ittiham edir, amma belə bir vərəqə olduğunu göstərmir.

“Bəyan edirik ki, keçirilən son aksiyalar Müsavat və ya digər müxalifət partiyaları tərəfindən təşkil edilməyib, bu aksiyalar dözülməz sosial durumda yaşayan əhalinin haqlı etirazlarının təzahürüdür”, deyə bəyanatda vurğulanır.

Partiya iqtisadi tələblərlə etiraz aksiyaları keçirənlərə  aşırı qüvvə tətbiqini, qeyri-insani rəftarı, daxili qoşun qüvvələrindən istifadəni qətiyyətlə pisləyir. Partiya üzvlərinin hüquq-mühafizə orqanlarına çağırılmasına son qoymağı tələb edir.

Son olaraq, bəyanatda bu aksiyalarda həbs edilənlərin azad olunmasını, cinayət işlərinin dayandırılması, bütün siyasi məhbusların buraxılması tələb edilir.  -05C-