Müsavat Partiyasının Divanı ictimai-siyasi durumdan narahatlığını ifadə edib

Çərşənbə axşamı Müsavat Partiyası Divanının növbəti toplantısı keçirilib. Bu haqda Turan-a partiyadan məlum olub.

Müsavat partiyası başqanı İsa Qəmbər bu günlərdə ABŞ səfirliyi ilə partiya liderlərinin görüşü haqda məlumat verib. Müsavat başqanı görüşdə açıq müzakirələrin keçirildiyini diqqətə çatdırıb. 

İctimai-siyasi duruma dair müzakirələrdə cəmiyyətin narahatlığına, gənclərin etiraz aksiyalarına baxmayaraq, orduda ölüm hallarının davam etməsi vurğulanıb. Partiya orduda ölüm hallarına etiraz olaraq keçirilən aksiyaları dəstəklədiyini bəyan edib.

Partiya sədrinin müavini Gülağa Aslanlı yanvarın 13-də Lənkərana səfər zamanı partiya başqanı İsa Qəmbərə və nümayəndə heyətinə qarşı törədilən sui-qəsd cəhdi ilə bağlı Lənkəran şəhər rayon polis şöbəsində ifadə verdiyini bildirib.

“Tolişo sədo” qəzetinin redaktoru Hilal Məmmədovun məhkəməsi də diqqət mərkəzində olub. Məhkəmənin qapalı keçirilməsinə etiraz olaraq H.Məmmədovun hələ də məhkəmə zalında ağzını bağlayaraq, qulaqlarına pambıq tıxayaraq üzünü divara tutduğu xatırladılıb. G.Aslanlı H.Məmmədova dəstək aksiyasında iştirak etməsi haqda məlumat verib. 

Divanın toplantısında demokratik düşərgənin müxtəlif qüvvələri arasında əməkdaşlıq təkliflərinə dair fikir mübadiləsi olub, seçkilərə hazırlıq məsələləri müzakirə olunaraq uyğun qərarlar qəbul edilib.-05D-