Müsavat Partiyasının sədri postuna namizədlər təzyiqlərə məruz qalır

Bakı /04.10.19/Turan: Müsavat Partiyasının sədri postuna namizədlər regionlarda seçkiqabağı görüşlər zamanı təzyiqlərə məruz qalırlar.

Belə ki, oktyabrın 3-də Xaçmaz rayonunun sakinləri İlyas Yasinov, Ramazan Əliyev və Söhrab Əmrahov Müsavat Partiyasının başqanı Arif Hacılı ilə görüşdə iştirak etdikdən sonra yerli polis idarəsinə çağırılıblar. Polisdə onlara müxalifətlə əlaqədə olmamağı, problem yaşamamaq üçün ondan uzaq durmağı tövsiyə ediblər.

Müsavat Partiyası başqanlığına digər namizədlər Yadigar Sadıqlı və Tofiq Yaqublunu Qəbələ rayonuna buraxmayıblar.

"Qəbələ Polis İdarəsinin çoxlu sayda polisi, o cümlədən rəis müavini və cinayət axtarış şöbəsinin rəisi məni Yadigar Sadıqlı ilə birgə polis idarəsinə apardılar. Xeyli çək-çevirdən sonra bizi həbs etməkdən daşındılar, sadəcə, rayon ərazisindən çıxardılar", - Tofiq Yaqublu Facebook səhifəsində yazıb.

Müsavat Partiyası öz bəyanatında polisin hərəkətini pisləyib.

"Müsavat Partiyasının demokratik prinsiplər əsasında qurultay təşkil etməsi hakimiyyəti narahat edib. Xüsusən rayonlarda vətəndaşların bir yerə toplaşmasından, siyasi müzakirələr aparmasından narahat olan repressiv rejim Müsavat Partiyasının başqanlığına namizədlərin qurultay nümayəndələri ilə görüşlərinə əngəllər yaradır", - bəyanatda deyilir.

Xatırladaq ki, oktyabrın 12-də Müsavat Partiyası növbəti 9-cu qurultayını keçirəcək. Partiya sədrliyinə 3 namizəd var: Arif Hacılı, Yadigar Sadıqlı vəTofiq Yaqublu.-03B-