Müsavatçıları yenə Lənkəranda saxladılar

Qarşıdakı prezident seçkilərlə bağlı Masallıda treninqlər keçirən Müsavat Partiyası funksionerləri polis əhatəsindədir. Bu haqda Turan-a Mustafa Hacıbəyli bildirib. Onun sözlərinə görə, treninqə partiyanın Masallı, Cəlilabad və Biləsuvar təşkilatlarının rəhbərləri qatılıblar. 

Treninqdən sonra partiya funksionerləri və yerli partiya liderləri Müsavat Partiyası başqanının həbsdə olan müşaviri Yadigar Sadıqlının ailəsinə baş çəkmək istəyi ilə Lənkərana yola düşmək istəyiblər. Bu zaman mülki geyimlilər fotoaparat və videokameralarla müsavatçıları çəkməyə başlayıblar. Daha sonra hadisə yerinə polislər toplaşıb.  Polis əhatəsində olmaların baxmayaraq, müsavatçılar  Lənkərana yola düşdüklərini deyib. Polislər də izləməni davam etdiriblər. M.Hacıbəylinin sözlərinə görə, qara rəngli 035 nömrəli “CİP”də 4 polis zabiti əyləşib. Polislər hələlik hərəkətə mane olmurlar, amma izləməni davam etdirirlər. 

Saat 17:45-də Turan ilə əlaqə saxlayan M.Hacıbəyli özü də daxil olmaql 5 nəfər müsavatçının Lənkəranda saxlandığını və rayon polis idarəsinə aparıldığını bildirib. Polisə aparılan müsavatçılara Y.Sadıqlının ailəsini ziyarət edə bilməyəcəkləri barədə xəbərdarlıq edilib və daha sonra polisin müşayiəti ilə rayon ərazisindən çıxarılıblar. -05B-