Müxalifət İlham Əliyev barədə - o, yenə öz səviyyəsini göstərdi

Dünən dövlət başçısının çıxışında müxalifətin əleyhinə səsləndirdiyi növbəti tənqid cavab reaksiyasına səbəb olub. Bu çıxışı Turan agentliyinə şərh edən Azərbaycan naminə İctimai Forumun rəhbəri Eldar Namazov İlham Əliyevin çıxışında hansısa yenilik olmadığını bildirib. “Yenilik o idi ki, son günlər hakimiyyət cəmiyyətdə vətəndaş cəmiyyəti və müxalifətlə dialoq istəməsi barədə mif yaratmağa cəhd edirdi. Mən əvvəldən də buna inanmamışdım və vətəndaş cəmiyyəti ilə ilk görüşdən imtina etmişdim”, - deyə o qeyd edib. 

    Eldar Namazov hesab edir ki, İ.Əliyevin çıxışından sonra artıq bütün suallara nöqtə qoymaq olar. “Hakimiyyət demokratik qüvvələrlə heç bir dialoqa hazır olmadığını göstərdi”, - deyə Namazov bildirib.  

    AXCP sədri Əli Kərimli İlham Əliyevin çıxışını məntiqdən kənar, monoloq kimi qiymətləndirib. “Təəssüf ki, Azərbaycanı qanunsuz idarə edən insan bu şəkildə danışmağı özünə rəva bilir”, deyə o bildirib. 

    “İlham Əliyev bizimlə heç vaxt debata çıxmır. Debat olarsa, yerində cavabı verilər. Müxalifətə qarşı seçdiyi leksikona gəlincə, səbri çatmadı ki, başladığı oyunu axıra çatdırsın. Guya cəmiyyətlə, müxalifətlə dialoq başladırdı. Nə oldu bəs? Dialoq başlar-başlamaz bütün opponentlərini aşağılayan, arqumentsiz, cəfəng fikirlər səsləndirdi. Əlbəttə ki, bu gün Azərbaycanı idarə edənlərin vətənpərvərlikdən danışmağa haqqı yoxdur. Bu adam bizi satqınlıqda necə ittiham edə bilər ki, Qarabağ savaşı boyunca Azərbaycana gələ bilməyib. Atası dövlət başçısı olanda 33 batalyonu tərxis edib və Azərbaycanın 6 rayonunun işğalına şərait yaradıb. İndi də bizimlə bu şəkildə soyuq savaş apardığı halda, həftədə bir erməni liderləri ilə isti münasibətli görüşlər keçirir”, - deyə ironiya ilə bildirib.

    AXCP sədri deyib ki, avtoritar liderlərin özləri kimi, çıxışları da bir-birinə bənzəyir. “Hamısı beləcə uçuruma doğru addımlayır. Müxalifət dəfələrlə mitinqlər keçirib və bundan sonra da aksiyalar davam edəcək. Bunun «Eurovision»a aidiyyatı yoxdur”, - o qeyd edib. 

    Öz növbəsində, Müsavat Partiyasının başqanı İsa Qəmbər İlham Əliyevin belə səpgili çıxışının ilk dəfə olmadığını vurğulayıb. Eyni zamanda son çıxışdakı ritorikanın narahatlıqdan yarandığı qeyd edilib. 

    Ölkədə demokratik dəyişikliyin labüdlüyünü İ.Əliyevin özü də başa düşür. Amma o, ətrafına, cəmiyyətə və xalqa heç nəyin dəyişməyəcəyi mesajı verir. “Buna görə İ.Əliyev öz xalqına qarşı düşmən mövqe tutur. Amma bu mövqe İ.Əliyevə hörmət və uğur gətirməyəcək”, - deyə Müsavat başqanı mövqeyini ifadə edib.

    O, ölkədə demokratik dəyişikliklər baş verəcəyindən əminliyinin ifadə edərək, İctimai Palatanın bu dəyişiklikləri həyata keçirəcəyini və bunun qarşısını heç bir qüvvənin ala bilməyəcəyini vurğulayıb. -05B04-