NATO baş katibi Gürcüstana gəlib

Şimali Atlantika Şurası və NATO baş katibi Yens Stoltenberq çərşənbə günü Gürcüstana ikigünlük səfərə gəliblər.

Elə həmin gün baş nazir Georgi Kvirikaşvilinin iştirakı ilə NATO-Gürcüstan komissiyasının iclası keçirilib.

Cümə axşamı Stoltenberq Gürcüstan prezidenti Georgi Marqvelaşvili, müdafiə naziri Levan İzoriya və parlamentin sədri David Usupaşvili ilə danışıqlar aparacaq.

NATO baş katibi həmçinin Tbilisidə parlament binasında tələbələr qarşısında çıxış edəcək, xəbəri RİA-Novosti yayıb.

Bu, Stoltenberqin NATO baş katibi qismində Gürcüstana ikinci səfəridir. Sonuncu dəfə o, 2015-ci ilin avqustunda bu ölkəyə səfər edib. Gürcüstanda Şimali Atlantika Şurasının sessiyasının keçirilməsi haqqında qərar alyansın Varşava sammitində qəbul edilib. Nümayəndə heyətinin tərkibinə baş katibdən başqa, NATO-ya üzv ölkələrin səfirləri də daxildir.

Gürcüstan hakimiyyəti açıq-aşkar NATO-ya daxil olmaq istəyini bəyan edir. 2008-ci ilin aprelində Buxarestdə NATO-ya üzv ölkə başçılarının sammitində təsdiq edilib ki, Gürcüstan alyansın standartlarına uyğun olmaq şərtilə gələcəkdə NATO-nun üzvü ola bilər. Bundan sonra avqustda Rusiya təcavüzü və Abxaziya və Cənubi Osetiyanın işğalı baş verib.

2014-cü ilin sentyabrında Uelsdə NATO sammitində Gürcüstanın alyansa üzvlük səylərinə yardım edən tədbirlər paketi təsdiq edilib. -02В-