Naxçıvan sakini siyasi fəaliyyətinə görə təqibə məruz qalıb

Naxçıvan sakini Əşrəf Həsənov cümə axşamı RATİ-də mətbuat konfransı keçirərək özünün və ailə üzvlərinin Naxçıvan MTN tərəfindən təqiblərə məruz qaldığını 

bildirib.

Onun sözlərinə görə, təqiblərə məruz qalmasına səbəb Naxçıvandakı haqslıqlara etiraz etməsi və siyasi fəaliyyətidir. Belə ki, İcitmai Palatanın Naxçıvan təşkilatına üzv olduqdan sonra Naxçıvan MTN Babək rayon bölməsi ona qarşı təqiblərə başlayıb. Bu təqiblərə cavab olaraq Ə.Həsənov bu il yanvarın 29-da RATİ-də mətbuat konfransı keçirib. Sonra Naxçıvana qayıdıb. Həmin gün MTN Babək rayon bölməsindən Ə.Həsənova telefon vasitəsilə şöbəyə gəlməsi tələb olunub. Ə.Həsənov bundan imtina edib. Yanvarın 30-da Ə.Həsənovun evinə basqın olub. Ə.Həsənov özü qaça bilsə də ailə üzləri bu adamların zorakılığına məruz qalıb. Ə.Həsənovun xanımı Təyibə Həsənova qızlarının, üç aylıq hamilə olan gəlininin bu adamlar tərəfindən döyülüb, təhqirlərə məruz qaldığını söyləyib.   

Ə.Həsənov yanvarın 31-də İran tərəfə keçməklə oradan Bakıya gələ bilib. Fevralın 1-də isə xanımı T.Həsənova Bakıya gəlib.   

Mətbuat konfransında T.Həsənova qonşularına istinadən MTN nümayəndələrinin fevrlaın 1-də də həyətlərinə gəldiklərini, həyətdə axtarış apardıqlarını deyib. T.Həsənova bu axtarışı aparanların həyat yoldaşı və ailə üzvlərini şərləyə bilmək üçün həyətlərinə hansısa əşya atmalarından ehtiyat etdiyini deyib.

Ə.Həsənov qeyd edib ki, mətbuat konfransı keçirməkdə məqsədi özünün və ailə üzvlərinin həyatlarının təhlükədə olmasını ictimailəşdirmək, bu haqda dövlət rəhbərliyini xəbərdar etməkdir. Dövlət başçısı İlham Əliyevə və xanımı Mehriban Əliyevaya müraciət edən ailə başçıları ailə üzvlərinin təhlükəsizliyini təmin etməyi xahiş ediblər. Əks halda hansısa xarici ölkədən sığınacaq istəyəcəklərini nəzərə çatdırıblar.-05C-