Naxçıvanlı jurnalistlər bir neçə saatdır ki, dindirilir

Dekabrın 26-da səhər jurnalistlər İlqar Nəsibov və Elman Abbasov Sədərək Rayon Polis İdarəsinə çağırılıblar. Saat 11.00-da başlanan dindirmə indiyədək davam edir.

İ.Həsibovun həyat yoldaşı,  yerli Demokratiya və QHT-nin İnkişafı Resurs Mərkəzinin direktoru Məlahət Nəsibova bildirib ki, jurnalistlərin dindirilməsində yerli polis və prokurorluğun rəhbərlərindən başqa Naxçıvanın baş prokuroru Səbuhi Haqverdiyev də iştirak edir. O, Naxçıvan şəhərindən məhz bundan ötrü gəlib.   

Xatırladaq ki, jurnalistlər dekabrın 8-də yerli sahibkarlar Nadir Məmmədovla Məmməd Qurbanovun gömrük işçiləri tərəfindən döyülərək həbs olunmasını işıqlandırıblar. 

Münaqişəyə gömrükdə onlardan rüşvət istənilməsi səbəb olub. Jurnalistlər gələrkən gömrükçülər onlara hücum ediblər. Bundan sonra sahibkarlara qarşı hakimiyyət nümayəndələrinə müqavimət ittihamı ilə cinayət işi qaldırılıb. 

Ötən gün vəkillərdən biri N.Məmmədovla görüşdüyünü bildirib. N.Məmmədov ona işgəncə verildiyini və adı çəkilən jurnalistlərə qarşı zorla ifadə alındığını deyib. “Mən İlqarla Elmanın bu uydurma ittihamla həbs oluna bilməsindən ehtiyat edirəm”, - M.Nəsibova Turan-a bildirib.