Prezident İlham Əliyevlə Bidzina İvanişvilinin görüşü olub

Çərşənbə günü Bakıda prezident İlham Əliyevlə Azərbaycana rəsmi səfərə gəlmiş Gürcüstanın baş naziri Bidzina İvanişvilinin görüşü olub. 

Görüş zamanı regional məsələlər, həmçinin Azərbaycan-Gürcüstan münasibətlərinin genişləndirilməsi və möhkəmləndirilməsi perspektivləri müzakirə edilib. Bu barədə prezident İ.Əliyevin saytı məlumat verir.

Səfər çərçivəsində B.İvanişvili həmçinin baş nazir Artur Rasizadə ilə görüşəcək. 

Danışıqların ən mühüm bəndi Bakı-Tbilisi-Axalkalaki-Qars dəmir yolu layihəsinin taleyidir. Ötən həftə B.İvanişvili layihənin Gürcüstanı çox da qane etmədiyini bildirmişdi.

““Ola bilsin ki, Azərbaycana səfərim zamanı bu məsələləri qaldırdım və bizə dost ölkəyə yumşaqcasına bildirdim ki, hansısa mərhələdə bu, bizim üçün faydalı olmayacaq və bu məsələnin nizamlanması lazımdır”, - o qeyd etmişdi. 

Bir gündən sonra isə mətbuat konfransında bildirib ki, Bakıda bu layihəni müzakirə etmək niyyətində deyil. Onun sözlərinə görə, bu məsələ üzərində qrup işləyir və bu, kifayətdir. 

Azərbaycan Gürcüstanın Türkiyədən sonra ikinci ticarət tərəfdaşıdır. 11 ayda Azərbaycanla Gürcüstan arasında xarici əmtəə dövriyyəsi 

28,1% artaraq 1 mlrd. 150 mln. dollar təşkil edib ki, bu da Gürcüstanın bütün xarici ticarət dövriyyəsinin 12,3%-ni təşkil edir. -02D-