Nazim Bəydəmirli saxlanma şəraitindən narazıdır

Həbsdə olan iqtisadçı və sabiq deputat Nazim Bəydəmirli saxlanma şəraitindən narazıdır.

Bu barədə Turana onun yoldaşı Fəridə Bəydəmirli məlumat verib. 

Onun sözlərinə görə, iqtisadçını 13 saylı cəzaçəkmə müəssisəsinə köçürüblər və bu barədə yaxınlara heç bir məlumat verməyiblər: "Ötən cümə günü Nazim zəng etməyib deyə, 1 saylı istintaq təcridxanasına zəng vurdum. Mənə hər şey qaydasına olduğunu dedilər. Amma üstündən bir neçə saat keçib, Nazim zəng vuraraq artıq 13 saylı cəzaçəkmə müəssisəsinə köçürüldüyünü deyib". 

F.Bəydəmirlinin sözlərinə görə, dekabrın 24-də yoldaşı ilə görüşüb: "Karantindədir, amma görüşümüzə şərait yaradıblar. Nazim mənə dedi ki, saxlandığı şərait bərbaddır. Üstəlik də hazırda 20 məhkumla bir otaqda saxlanılır. Onların hamısı da müxtəlif cinayətlərə görə 20-25 il müddətinə həbs olunmuş adamlardır". 

İqtisadçının yoldaşı onun səhhətində hələ də ciddi problemlərin olduğunu qeyd edib: "Keçən ildən bu günə qədər Nazimin səhhətində yaranmış xəstəlikləri müalicə etmək üçün heç bir ciddi addım atılmayıb və ürəyində yaranmış problem qalır. Nazimi bu şəraitdə saxlamaq onu ölümə tərk etməkdir. Mən Penitensiar Xidmətin rəisi Mirsaleh Seyidova müraciət edirəm: Nazim bəyi başqa cəzaçəkmə müəssisəsinə köçrülməsinə göstəriş verməyinizi xahiş edirəm".

İş saatı olmadığına görə Penitensiar Xidmətindən münasibət öyrənmək mümkün olmayıb. 

* Nazim Bəydəmirli 4 iyul 2023-cü il tarixində Cinayət Məcəlləsinin 182.2.4-cü (əmlaka sahib olmaq məqsədilə hədə-qorxu ilə qəsb etmə) maddəsilə Daxili İşlər Nazirliyinin Mütəşəkkil Cinayətkarlığa Qarşı Mübarizə İdarəsi tərəfindən saxlanılıb.

Ertəsi gün məhkəmə onu 4 ay həbs edib. Bəydəmirli ittihamı rədd edərək onu uydurma adlandırıb.

1 sentyabr 2023-cü ildə Bəydəmirliyə qarşı daha bir ittiham irəli sürülüb - Cinayət Məcəlləsinin 182.2.2-ci maddəsinin pozulması (təhdid yolu ilə tələb etmə, dəfələrlə törədildikdə). Vəkilin sözlərinə görə, bu ittiham ona əsaslanır ki, guya 1996-cı ildə Bəydəmirli Rusiyanın Lipetsk şəhərində kimdənsə pul tələb edib. Hüquq müdafiəçiləri Nazim Bəydəmirlini siyasi məhbus kimi tanıyıblar.

2024-cü il  ыутенфикжт 30-da məhkəmə onu 8 il müddətinə azadlıqdan məhrum edib. Dekabrın 11-də apellyasiya məhkəməsi bu qərarı qüvvədə saxlayıb.