Nazirlər Kabineti �Molokan evi�nin məsələsinə baxır: iyulun 5-də orada elektron musiqi konserti olacaq

Bakı/02.07.19/Turan: "Salaam Sinema" Gənclər Hərəkatının rəhbəri İlkin Hüseynov Nazirlər Kabinetindən məktub alıb ki, hökumət gənclərin sökülməkdən qoruduğu "Molokan evi" adlanan bina ilə bağlı məsələyə baxır. Bina Süleyman Rüstəm, 10 və Süleyman Rəhimov küçələrinin kəsişməsində yerləşir.

"Azərbaycan Milli Elmlər Akademiyası binanın tarixi və memarlıq dəyəri barədə rəyini Nazirlər Kabinetinə təqdim edib. Nazirlər Kabineti isə öz məktubunda bildirib ki, "Molokan evi" məsələsinə baxılır", - İ.Hüseynov deyib.

Onda olan məlumata görə, bina yerli əhəmiyyətli qorunan obyektlər siyahısına daxil ediləcək. Nəticə etibarilə binanın fərdi şəxs tərəfindən özəlləşdirilməsi və bu obyektin satışı mümkün deyil.

"Salaam Sinema" binaya dövlət tərəfindən qorunan obyekt statusunun verilməsini tələb edir. Binanı icarəyə götürən gənc fəallar bu ilin yazında onun sahibi binanı sökmək istərkən oranı tərk etməyiblər.

Hazırda "Molokan evi"nin qapısı bağlıdır, giriş həyətdəndir.

"Salaam Sinema"nın fəalları binanı təmir edirlər, iyulun 5-də keçiriləcək elektron musiqi konsertinə hazırlaşırlar. Həmin gün zalda sonuncu mərtəbədə Avropada yaşayan azərbaycanlı musiqiçilər Ya Tosiba və Fərhad Fərzəli çıxış edəcəklər. -0-