Ned Prays ABŞ Dövlət Departamentinin sözçüsü vəzifəsini tərk edir

Vaşinqton/08.03.23/Turan: Dövlət Departamentinin sözçüsü Ned Prays iki ildən artıq vəzifədə qaldıqdan sonra bu ay mətbuat katibi vəzifəsini tərk edəcək.

TURANın Vaşinqton müxbiri xəbər verir ki, o, birbaşa dövlət katibi Blinkenlə işləyərək başqa vəzifəyə keçəcək.

Dövlət katibi Entoni Blinken çərşənbə axşamı deyib: "Ned ABŞ hökumətinə bütün dünyada mətbuat azadlığını qorumağa və təşviq etməyə kömək etdi".

"Onun töhfəsi  vəzifədən getdikdən sonra da Departamentə fayda verəcək" – Blinken qetd etdi.

İşlədiyi müddətdə 200-dən çox brifinq keçirən Prays tez-tez ABŞ xarici siyasətinin siması və səsi olub. O, Bayden administrasiyasının bir sıra mühüm xarici siyasət məsələlərində, o cümlədən Rusiyanın Ukraynaya müdaxiləsi, qoşunların Əfqanıstandan çıxarılması, İranın regiondakı bədxah hərəkətləri və Cənubi Qafqazda baş verən hadisələrlə bağlı mövqeyi barədə məlumat verib. -0-