Nəsimi Rayon Məhkəməsi Rauf Mirqədirovun vəkillərinin rəyinə məhəl qoymayıb

Rauf Mirqədirovun vəkilləri jurnalistin həbs müddətinin uzadılması ilə bağlı Nəsimi Rayon Məhkəməsinin 15 iyul tarixli qərarından apellyasiya şikayətini geri götürüblər.

Bundan əvvəl müdafiə tərəfi iyulun 19-da apellyasiya şikayətilə yanaşı həbs müddətinin uzadılması zamanı çoxsaylı prosessual pozuntular barədə öz iradlarını Nəsimi məhkəməsinə təqdim ediblər.

Lakin Nəsimi məhkəməsi CPM-in 51.7-ci maddəsini pozaraq iradlara baxmadan işi Bakı Apellyasiya Məhkəməsinə göndərib. Bunu Turan-a vəkil Elmar Süleymanov bildirib.

Sözügedən maddəyə uyğun olaraq hakim ya iradları təsdiqləyir, ya da əgər razı deyilsə müvafiq qərar qəbul edir.

Bununla əlaqədar müdafiə tərəfi apellyasiya şikayətini geri götürərək Bakı Apellyasiya Məhkəməsindən xahiş edir ki, iclasın protokoluna iradlara baxılması üçün işi Nəsimi məhkəməsinə göndərsin.

Müdafiə tərəfi R.Mirqədirovun həbs müddətinin uzadılması barədə iradlara dair qərarın qəbulundan sonra apellyasiya şikayətinin BAM-a göndərilməsini xahiş edir.

* Rauf Mirqədirov aprelin 19-da Türkiyədən deportasiya olunduqdan sonra saxlanılıb. O, Ermənistanın xeyrinə casusluqda vətənə xəyanətdə ittiham olunub.

Aprelin 21-də məhkəmə onun barəsində 3 ay müddətinə həbs qətimkan tədbirini seçib. İyulun 15-də həbs müddəti uzadılıb. Jurnalist ittihamları rədd edərək absurd və siyasi motivli hesab edir. –06D—