NİDA fəalı MTN-də işgəncələrə məruz qaldığını bildirib

Dekabrın 18-də Ağır Cinayətlərə dair İşlər üzrə Məhkəmədə Cavid Hüseynovun sədrliyi ilə NİDA hərəkatının 7 fəalı və “Azad gənclik” təşkilatının üzvü İlkin Rüstəmzadənin işi üzrə proses davam edib.

İclasın əvvəlində Rüstəmzadə şifahi vəsatətlə çıxış edərək, prosesin audio və videoçəkilişinin aparılmasına icazə verilməsini xahiş edib. O, həmçinin məhkəmə qərarı olmadan həbs müddətinin uzadılması haqqında qərarın əsassız olduğunu bildirib.

Təqsirləndirilən Rəşad Həsənov dekabrın 12-də bundan əvvəlki iclasın təxirə salınması səbəbinin izah edilməsini tələb edib. Digər təqsirləndirilən Rəşadət Axundov məhkəmənin müstəqil olmadığını və hakimlərin dekabrın 12-dəki iclası keçmiş prezident Heydər Əliyev yas mərasimi olduğuna görə təxirə saldığını deyib. Zalda iştirak edənlər Axundovun bu sözlərini alqışla qarşılayıblar.

Hakim Rüstəmzadənin vəsatətini təmin etməyib.

Təqsirləndirilən şəxslər və vəkillər həmçinin iclasın aparılması forması ilə bağlı etirazlarını bildirərək, zalda səslərin pis eşidildiyini qeyd ediblər. Vəkil Elton Quliyev məhkəməni normal iş şəraitini təmin etməyə çağırıb.

Daha sonra təqsirləndirilən Bəxtiyar Quliyevin dindirməsi başlayıb. Dövlət ittihamçısının “ailənizin sizin gördüyünüz işlərdən xəbəri varmı?” sualı etiraza səbəb olub və o, sualları cavablandırmaqdan imtina edib.

Daha sonra Şahin Novruzluya ifadə vermək təklif olunub. Lakin o, imtina edib və ittiham tərəfin dəlilləri araşdırıldıqdan sonra çıxış edəcəyini bildirib.

Sonra hakim onun martın 7, 8, 9-da, aprel və sentyabr aylarında istintaqa verdiyi ifadələri oxuyub. İlkin ifadələrində Novruzlu Quliyevin ondan tüstü şaşkaları düzəltməyi xahiş etdiyini, o isə bunu bacarmadığı barədə cavab verdiyini deyib. Digər ifadələrdə Quliyevin guya Novruzluya mitinqdə istifadə üçün “Molotov kokteyli” düzəltmək lazım olduğunu dediyi iddia olunur.

Bundan başqa, facebook-da NİDA fəallarının bağlanan səhifəsində Rəşad Həsənovun və digərlərinin guya hakimiyyəti devirmək zərurəti haqqında yazdıqları qeyd edilir. “Onların əsas məqsədi inqilab törətmək idi”, deyə guya Novruzlu MTN-də bildirib. Lakin o, bu ifadələrdən imtina edərək, ona təzyiq göstərildiyini qeyd edib.

“Məni döyüblər, ailəmi təhdid ediblər, 4 dişimi sındırıblar. Bunu Qasım Məmmədov adlı şəxs edib”, deyə Novruzlu bildirib. O, 27 sentyabr 2013-cü ildə irəli sürülmüş ittihamları təkzib etməsi haqqnda verdiyi ifadələri təsdiq edib.

Dövlət ittihamçısının və vəkillərin suallarına cavabda o, ilkin ifadələri verərkən yetkinlik yaşına çatmadığını xatırladıb.

Bu, qanun pozuntusudur, belə ki, yetkinlik yaşına çatmamış şəxsin dindirilməsi zamanı təkcə vəkili deyil, qanuni nümayəndəsi – doğmalarından biri də iştirak etməlidir. Daha sonra Novruzlu prokurorun suallarını cavablandırmaqdan ittiham edib. Proses dekabrın 19-da saat 10.30-da davam edəcək.

Xatırladaq ki, bu iş üzrə adı keçən gənclər 10 mart etiraz aksiyasında kütləvi iğtişaşlar hazırlamaqda ittiham olunurlar. Onlara qarşı həmçinin qanunsuz silah, narkotik saxlamaq və xuliqanlıq ittihamları irəli sürülüb.

Amnesty İnternational beynəlxalq hüquq müdafiə təşkilatı bütün təqsirləndirilənləri “vicdan məhbusu” kimi tanıyıb. -16C06-