NİDA fəallarının həbs müddəti uzadılıb

Bu gün Nəsimi Rayon Məhkəməsi NİDA vətəndaş hərəkatının həbsdə olan iki üzvünün barəsində seçilmiş həbs qətimkan tədbirinin daha 3 ay müddətinə uzadılması barədə qərar qəbul edib.

Vəkil Əsabəli Mustafayevin  Turan-a verdiyi məlumata görə, Rəşad Həsənov və Bəxtiyar Quliyevin həbs müddəti dekabrın 7-dək uzadılıb. Onun sözlərinə görə, ibtidai istintaq  eyni arqumentlərini bu dəfə də təkrarlayaraq  bildirib ki, həbs müddətinin uzadılması onunla əsaslandırılıb ki, yeni istintaq hərəkətləri aparılmalı, ekspertiza rəyləri alınmalıdır.

Vəkil bu arqumentlərin əsassız olduğunu bildirib  və apellyasiya şikayətinin veriləcəyini deyib.

Eyni zamanda məhkəmədə çıxış edən R.Həsənov indiyədək həbs edilməsinin səbəbini bilmədiyini və ona qarşı heç kimin əlavə ifadə vermədiyini vurğulayıb. Buna görə həbsdə saxlanmasının lüzumsüz olduğunu deyib.

 Eyni zamanda daha bir NİDA-çı Məhəmməd Əzizovun da  həbs müddətinin uzadılacağı gözlənilir.

NİDA vətəndaş hərəkatının 7 üzvü həbs edilib.  Martın 9-da NİDA-nın üç fəalı – Şahin Novruzlu, Bəxtiyar Quliyev və Məhəmməd Əzizov saxlanılıb. Məhkəmə onların narkotik və partlayıcı maddələr saxlamaq ittihamı ilə 3 ay müddətinə həbs edib.

İstintaq onların mənzilində narkotik maddə və “Molotov kokteyli” aşkarlayıb. Lakin gənclərin ailə üzvləri bunların mənzillərə gənc fəalları saxlayan MTN işçiləri tərəfindən qoyulduğunu deyir.

Amnesty İnternational onları “vicdan məhbusu” sayır.-16B-